قازاقستان رەكوردتار كىتابى 12ء-شى رەت جارىق كوردى
وسىمەن 12ء-شى رەت شىققان قازاقستان رەكوردتار كىتابىنا بۇل جولى سپورتشىلار، مەديسينا وكىلدەرى، ادەبيەت سالاسى، فوتوگرافيا، رەجيسسۋرا جانە قولونەرشىلەر ەندى.
ەل اراسىندا «قازاق تيتان» اتانعان المات جۇمانوۆ – قارا كۇش يەسى. ول جۇك تيەلگەن 109 توننالىق ۆاگوندى 8،5 مەترگە سۇيرەگەن. ونىڭ بۇل جەتىستىگىن گيننەستىڭ رەكوردتار كىتابى مويىنداپتى. «ءبىراق ارنايى سەتيفيكات ءالى قولىما تيگەن جوق»، - دەيدى المات.
المات جۇمانوۆ، رەكوردشى:
– 300 كەلى بولاتىن تۇيەنى يىعىما سالىپ الدىم دا، ەكى دجيپ، ءبىر جەڭىل ماشينا سونىڭ ءبارىن 13 مەترگە دەيىن تارتىپ سۇيرەدىم، – دەدى سپورتشى.
ماراپاتتاۋ سالتاناتىنا قاتىسقان ازاماتتار رەكوردشىلاردىڭ تىزىمىنە بەكەر قوسىلماعاندارىن دالەلدەدى. ولار حالىق الدىندا شەبەرلىكتەرىن كورسەتتى. شارا بارىسىندا ايدىن نۇرجۇما وتاندىق رەكورد جاسادى. شىنى سىنىقتارىن جالاڭ اياق باسىپ تۇرىپ، تىسىمەن جانە ءتوس سۇيەگىمەن 32 كەلى كىر تاسىن كوتەردى. ودان كەيىن بەت سۇيەگىمەن تاعى 10 كەلىنى باعىندىردى.
ايدىن نۇرجۇما، رەكوردشى:
– بالا كەزدەن كۇرەسپەن اينالىسقام، جاتتىقتىرۋشى اكەم ۇيرەتكەن. قازىرگى اينالىسىپ جاتقانىم تەمىر كوتەرۋ، كۇشپەن باعىندىرۋ ادىستەرىمەن 2020 جىلدان باستاپ اينالىسامىن. قازاقستاننىڭ رەكوردتار كىتابىنا ەكىنشى رەت كىرىپ جاتىرمىن. ءبىرىنشى كىرگەن دۇنيە - ول 63 كەلى كولىكتى ءتوس سۇيەكپەن تارتۋ.
قازاقستان رەكوردتار كىتابىنا ەنگەن 14 ادامعا ارنايى سەرتيفيكات تابىستالدى.