باعالاۋ كەرەك باقىتتى!
بيىل قازاق ەلىنىڭ ەگەمەن ەل بولعانىنا 30 جىل تولادى. وسىعان بايلانىستى قاستەرلى تاۋەلسىزدىگىمىزدىڭ قادىر-قاسيەتىن جاس ۇرپاققا ۇعىندىرۋ ماقساتىندا ساۋالنامانى جالعاستىرىپ كەلەمىز. كەزەكتى سۇحبات يەسى - III دارەجەلى «ەڭبەك داڭقى» وردەنى، قازاق سسر وقۋ مينيسترلىگىنىڭ قۇرمەت گراموتاسى، بىرنەشە مەدالداردىڭ يەگەرى، ارداگەر ۇستاز وسپانوۆ زۇلپىحار اعامىز.
بيىل اتا-بابالارىمىزدىڭ ەجەلدەن اڭساپ وتكەن اسىل ارماندارىنىڭ ءبىرى، ەگەمەندى ەل بولىپ، تاۋەلسىزدىك العانىمىزعا 30 جىل تولىپ وتىر. تاريحي تۇرعىدان العاندا 30 جىل كوپ ەمەس سياقتى.ال اتقارعان ىستەرگە كوز جۇگىرتسەك، قىرۋار جۇمىستاردىڭ اتقارىلىپ جاتقانىنا كۋا بولۋدامىز. قازاقستان وسى از ۋاقىتتىڭ ىشىندە الپاۋىت مەملەكەتتەر ەسەپتەسەتىن ەلگە اينالىپ وتىر. قازىرگى تاڭدا تاۋەلسىز ەلىمىزدىڭ كوك بايراعى اسپانىمىزدا جەلبىرەپ، ەلىمىز كۇننەن-كۇنگە الەمدىك ارەناعا قارىشتاپ قادام باسىپ كەلە جاتقانىنىڭ كۋاسى بولۋدامىز.
بۇل تاۋەلسىزدىك - اتا-بابالارىمىزدىڭ سارعايىپ كۇتكەن اسىل ارمانى.تاۋەلسىزدىك جولىندا قۇربان بولعان اتا-بابالارىمىزدىڭ توگىلگەن قاندارىنىڭ وتەۋى. نەبىر ەل باسقارعان حانداردىڭ، تالاي-تالاي جاۋعا اتويلاپ شاپقان باتىرلارىمىزدىڭ، جالپى، قازاق حالقىنىڭ باستى ارمانى ورىندالعان كەز. سوندىقتان دا تاۋەلسىزدىك تاريحىن ەشقاشان، ەشۋاقىتتا ەستەن شىعارماۋىمىز قاجەت. تاۋەلسىزدىكتىڭ تاريحى مەن ونىڭ قۇندىلىقتارىن كەلەشەك ۇرپاققا جەتكىزىپ وتىرۋ ءبىزدىڭ باستى ماقساتىمىز بولۋى ءتيىس.
تاۋەلسىز مەملەكەت - ىنتىماعى جاراسقان، اۋىزبىرشىلىگى بەرىك، ءوز ويىن وزدەرى ورتاعا سالىپ شەشە الاتىن، جەكە رامىزدەرى بار، اتا زاڭىن باسقا ەلدەر مويىنداعان، وزگە ەلدەرمەن ەمىن-ەركىن ارالاسىپ، قارىم-قاتىناستا بولا الاتىن ەل.
تاۋەلسىزدىك جاريالانعاننان بەرى كوپتەگەن ەلەۋلى جەتىستىكتەرگە قول جەتكىزىپ كەلەمىز. بۇل ەلباسىمىزدىڭ جۇرگىزگەن پاراساتتى كورەگەن ساياساتىنىڭ ارقاسى. پرەزيدەنتىمىزدىڭ ەل باسقارۋداعى ناتيجەلى جۇمىستارىنىڭ ايعاعى. ەلىمىزدىڭ تىنىشتىعى مەن قاۋىپسىزدىگى، كوپ ۇلتتى قازاق ەلىنىڭ ىنتىماعى مەن بىرلىگى. ەلىمىزدىڭ ەكونوميكاسىنىڭ قارىشتاپ دامي ءتۇسۋى. وسىنىڭ بارلىعى حالقىمىزدىڭ جانە وزگە ەلدەردىڭ قازاقستانعا دەگەن بەرىك سەنىمىن ارتتىرىپ كەلەدى. ءار ەلدىڭ بولاشاق تاعدىرىن ايقىندايتىن تاريحي كەزەڭدەرى بولادى. ارتقا تاستاعان وتىز جىلعا نە ىستەدىك دەگەن ساۋالعا جاۋاپ ىزدەر بولساق، تىزبەكتەپ جەتكىزۋ قيىن بولارى ءسوزسىز. تاۋەلسىزدىككە قول جەتكىزگەن العاشقى جىلدارىنداعى ەكونوميكالىق داعدارىس حالىقتىڭ تۇرمىس جاعدايىنا قاتتى اسەر ەتتى. بارلىق قيىندىقتاردان شىعۋ جولدارى جەدەل قاراستىرىلا باستادى. ەلباسىنىڭ ىسكەرلىگى مەن پاراساتتىلىعىنىڭ ارقاسىندا ەلىمىز امان-ەسەن تىعىرىقتان شىقتى. ەندىگى كەزەكتە ەل ەكونوميكاسىن كوتەرىپ، حالىقتىڭ ءال-اۋقاتىن ارتتىرۋ جولدارى قاراستىرىلا باستادى. بۇل سىنداردان دا سۇرىنبەي شىعۋ ءۇشىن كوپتەگەن جۇمىستار اتقارىلدى. ءاربىر اتقارعان جۇمىستار بۇل كۇندەرى ءبىر-بىر تاريح بولىپ قالىپتاستى. سول كۇندەردىڭ ءاربىر بەلەستەرى حالقىمىز ءۇشىن زور قۋانىش، ۇلكەن ءۇمىت، بولاشاققا دەگەن سەنىمدىلىكتى ارتتىردى. الدىڭعى بۋىن بىزدەر ءۇشىن سول كۇندەردىڭ قيىنشىلىعىنان كورى قۋانىشى مول بولاتىن. تاۋەلسىز ەل اتانىپ، اتا زاڭىمىز قابىلدانعان كۇن، رامىزدەرىمىزدىڭ بەلگىلەنگەن كەزى، ءتول تەڭگەمىزدىڭ اينالىمعا ەنگەن ۋاقىتى، ەلباسىن بەكىتۋ، پرەزيدەنت سايلاۋى - وسىلاردىڭ بارلىعى ەسىمىزدەن شىققان ەمەس.
استانامىزدى سارىارقا تورىنە كوشىرۋ كەزىندە دە ايتارلىقتاي قيىندىقتار بولدى. ءتاي-تايلاپ ەندى تاۋەلسىز ەل اتانىپ جاتقان كەزدە استانانى كوشىرۋ ەلباسىمىزدىڭ كوزسىز باتىرلىعى مەن بولاشاققا دەگەن سەنىمدىلىگىن كورسەتتى. ەلباسىمىزدىڭ باستاماسىمەن ەسىل بويىنا ەل قونىستاندىرۋدى، ونىڭ ىشىندە قانداس قاراكوزدەردى كوپتەپ تارتۋ نەگىزگى ماقسات بولدى. قازىرگى تاڭدا ەسىل بويىنداعى ءاربىر عيمارات ءوز الدىنا ءبىر تاريح. «بايتەرەك»، ازىرەت سۇلتان مەشىتى، «تاۋەلسىزدىك سارايى»، ۇلتتىق مۋزەي، «حان شاتىر»»، بەيبىتشىلىك جانە كەلىسىم» سارايى، «بەكىرە» كوپىر جانە باسقادا ءبىلىم، سپورت، ونەر، دەنساۋلىق وشاقتارى استانامىزعا اسەم كورىك بەرىپ وتىر. وسىنىڭ بارلىعى استانامىزدىڭ گۇلدەنە تۇسۋىمەن قاتار، شەتەلدىكتەردىڭ دە نازارىنا ىلىنۋدە.
بۇگىنگى كۇندەردە قازاقستان ەكونوميكالىق دەڭگەيى قالىپتى جاعدايعا جەتكەن، ءوز ستراتەگياسى بار تاۋەلسىز، دەموكراتيالىق، كوپ ۇلتتى زايىرلى مەملەكەت.
قازىرگى تاڭدا ەلىمىزدە بارلىق سالا بويىنشا العا ىلگەرىلەۋشىلىك انىق بايقالادى. حالىقتىڭ ءال-اۋقاتى، تۇرمىس جاعدايى جاقسارعان، قازاق ءتىلدى مەكتەپتەر مەن بالاباقشالار سانى ارتقان. ءبىلىم مەن دەنساۋلىق سالاسىنا وتە جوعارى دەڭگەيدە ءمان بەرىلىپ كەلەدى. دۇنيە جۇزىندەگى كوپتەگەن ەلدەرمەن قارىم-قاتىناسىمىز كۇننەن-كۇنگە جاقسارا تۇسۋدە. وسى اتقارىلعان جۇمىستار مەن جەتىستىكتەرىمىز - تاۋەلسىزدىكتىڭ جەمىسى.
اتا-بابامىزدىڭ اڭساپ وتكەن ارماندارىنا بۇگىن بىزدەر قول جەتكىزىپ وتىرعانىمىزعا شەكسىز ريزا بولۋىمىز ءتيىس. ولاي بولسا، تاۋەلسىز قازاقستاننىڭ وسىپ-وركەندەۋىنە بارلىق كۇش جىگەرىمىزدى اياماۋىمىز قاجەت.
ەلىمىزدىڭ كوك تۋى ماڭگىلىك جەلبىرەي بەرسىن دەسەك، ىنتىماعىمىز بەن بىرلىگىمىزدى بەرىك ۇستاپ، جاس ۇرپاقتى ەلىن، جەرىن، وتانىن جان-تانىمەن سۇيە بىلەتىن ازامات ەتىپ تاربيەلەي بەرەيىك! تاۋەلسىزدىك قۇندىلىعىن ۇمىتپايىق، اعايىن!