مەملەكەتىمىزدىڭ مارتەبەسى بيىكتەپ، رۋحى اسقاقتاي بەرسىن. قازاقستاندىقتاردى رەسپۋبليكا كۇنىمەن قۇتتىقتاعان پرەمەر-مينيستر ءاليحان سمايىلوۆ وسىلاي دەدى، دەپ حابارلايدى Almaty-akshamy.kz Inform.kz-كە سىلتەمە جاساپ.
«قۇرمەتتى قازاقستاندىقتار! سىزدەردى رەسپۋبليكا كۇنىمەن شىن جۇرەكتەن قۇتتىقتايمىن!
تاۋەلسىز ەلىمىز ءوزىنىڭ ءتول تاريحىندا بيىل تۇڭعىش رەت 25 قازاندى ۇلتتىق مەيرام رەتىندە اتاپ وتەدى. مەملەكەت باسشىسى قاسىم-جومارت كەمەل ۇلى توقايەۆ وسىناۋ ايتۋلى كۇننىڭ بۇگىنگى جانە كەلەشەك ۇرپاق الدىنداعى تاريحي تاعلىمىن العا تارتىپ، ەلىمىزدىڭ ەڭ باستى مەرەكەسى ەگەمەندىك كۇنىنە ۇلتتىق مارتەبە بەرۋ تۋرالى شەشىم قابىلدادى.
ەگەمەندىك دەكلاراسياسى حالقىمىزدىڭ ازاتتىق جولىنداعى ماڭگىلىك مۇراتىن اقيقاتقا اينالدىرعان قاستەرلى قۇجات، تاۋەلسىزدىككە باستاعان العاشقى قادامىنىڭ ايشىقتى سيمۆولى بولىپ قالا بەرمەك. ەل جادىندا قايتا جاڭعىرعان مەرەيلى مەرەكە مەملەكەتتىگىمىزدىڭ جاڭا ءداۋىرىنىڭ باستاۋىنا، مىزعىماس بىرلىگىمىزدىڭ بەرىك تۇعىرىنا اينالعاي.
ءبىز – ەگەمەندىك پەن ەلدىك، بەيبىتشىلىك پەن كەلىسىم سياقتى قاسيەتتى قۇندىلىقتاردى ءارقاشان ۇلىقتاي بىلگەن حالىقپىز. سوندىقتان تاۋەلسىزدىگىمىزدى نىعايتۋعا قالتقىسىز قىزمەت ەتۋ – ءارقايسىمىزدىڭ ازاماتتىق پارىزىمىز.
بارشاڭىزدى ۇلتتىق مەرەكەمىز – رەسپۋبليكا كۇنىمەن قۇتتىقتاي وتىرىپ، دەندەرىڭىزگە ساۋلىق، وتباسىلارىڭىزعا باقىت، ەڭبەكتەرىڭىزگە تولاعاي تابىس تىلەيمىن.
مەملەكەتىمىزدىڭ مارتەبەسى بيىكتەپ، رۋحى اسقاقتاي بەرسىن!» - دەلىنگەن ءا.سمايىلوۆتىڭ قۇتتىقتاۋىندا.