الماتىدا «رۋحاني كەلىسىم كۇنىنە» وراي سپارتاكيادا ءوتتى
جاقىن كۇندەرى ەلىمىزدە «رۋحاني كەلىسىم كۇنى» تويلانعان بولاتىن. بۇل كۇن - ەلىمىزدەگى ءارتۇرلى ۇلتتار مەن ءداستۇرلى دىندەردىڭ اراسىنداعى اۋىزبىرشىلىك پەن تاتۋلىقتىڭ، تىنىشتىق پەن تۇراقتىلىقتىڭ، بەيبىتشىلىك پەن ىنتىماقتىڭ مەرەكەسى. تاتۋلىقتى تۋ ەتكەن مەرەكەنىڭ قۇرمەتىنە وراي كەشە الماتى قالاسى ءدىن ىستەرى جونىندەگى باسقارمانىڭ باسشىلىعىمەن «ۇلتتىق مۇرا» باعدارلاماسى اياسىندا الماتىدا كەزەكتى سپارتاكيادا ءوتتى.
بۇقارالىق-سپورتتىق شارانىڭ شارتىنا سايكەس 16 جاستان اسقان الماتى قالاسىنىڭ تۇرعىندارى قاتىسۋعا مۇمكىندىك الدى. اتالعان شارا بارىسىندا قاتىسۋشىلار: ارقان تارتۋ، ارمرەستلينگ، گىر تاسىن كوتەرۋ، قوشقار كوتەرۋ، اسىق اتۋ، ميني-فۋتبول سەكىلدى سپورت تۇرلەرىنەن ب ا ق سىنادى.
جينالعان جاماعاتتىڭ نازارىن وزىنە اۋدارعان – «قوشقار كوتەرۋ» سايىسى بولدى. ويتكەنى جەڭىمپاز اتانعان بالۋان قوشقاردى جەتەكتەپ قايتادى. باسكە ەكى بىردەي قوشقار تىگىلىپ جينالعان كوپشىلىكتىڭ ءوز باقتارىن سىناپ كورۋلەرىنە مۇمكىندىك بەرىلدى. العاشقى توپتا ايدىن نۇعىمانوۆ 54 رەت كوتەرىپ جەڭىسكە جەتسە، ەكىنشى توپتان باۋىرجان ءابدىقايىموۆ ەشكىمگە دەس بەرمەدى. ول ءتىپتى ەكى مينۋت ىشىندە 58 رەت كوتەردى.
«بىرىنشىدەن وسى ساپارتاكيادانى ۇيىمداستىرعان قالالىق ءدىن ىستەرى جونىندەگى باسقارما باسشىلىعىنا جانە «ۇلتتىق مۇرا» باعدارلاماسىنا العىسىمدى ايتامىن. ءوزىم «قوشقار كوتەرۋ» سايىسىندا جەڭىمپاز بولدىم. كەشە عانا الماتى وبلىسىندا وتكەن جارىستا ۋاقىت شەكتەۋسىز بولىپ 1115 رەت كوتەرگەن ەدىم. بۇل جولى 2 مينۋت قانا بەرىلگەندىكتەن 58 رەت كوتەردىم. وسىنداي سپورتتىق شارالار ءجيى وتكىزىلىپ تۇرسا، قالا حالقىنىڭ سالاۋاتتى ءومىر سالتىن ۇستانۋىنا جانە دەنساۋلىقتارىنىڭ مىقتى بولۋىنا ىقپال ەتەدى»، - دەدى سپارتاكيادا جەڭىمپازى باۋىرجان ءابدىقايىم.
گىر تاسىن كوتەرگەن بىلەكتى جىگىتتەر دە كوپشىلىكتى تامساندىردى. تاستى 101 رەت اۋەلەتكەن ايدىن نۇعىمانوۆ باس جۇلدەنى يەلەنسە، 72 رەت كوتەرگەن ابزال تىلەۋبايەۆ ەكىنشى ورىنعا تۇراقتادى. جۇلدەلى ۇشتىكتى 71 رەت كوتەرگەن سايفۋللا ماليكوۆ تۇيىندەدى.
ارقان تارتقاندا ۇيىمشىلدىق تانىتقان «اسقار» توبىنىڭ ءاپايتوس جىگىتتەرى توپ جاردى. فينالدا ەسە جىبەرىپ العان «قۇدايبەرگەن» توبى 2-ورىن، ال «زاريا» توبى 3-ورىنعا تۇراقتادى.
ۇلتتىق ويىن – اسىق اتۋدا مەرگەندىگىمەن كوزگە تۇسكەن دياس سەرىكبايەۆ جەڭىمپاز بولدى. ال بىلەكتى جىگىتتەردىڭ باسەكەسى – ارمرەستلينگتە ابزال تىلەۋبايەۆ مىقتى ەكەنىن دالەلدەدى.
فۋتبول تۋرنيرىندە 28 كوماندا ونەر كورسەتتى. توپتىق كەزەڭنەن دە، پلەي-ووف ويىندارىنان دا مۇدىرمەي وتكەن «العاباس» پەن «ارلان» كوماندالارى باس جۇلدەنى ءوزارا ساراپقا سالدى. تارتىستى وتكەن فينالدىق ويىندا «العاباس» فۋتبولشىلارى جەڭىسكە جەتىپ، چەمپيون اتاندى. ال، جۇلدەلى ۇشتىكتى «ىلە-الاش» كومانداسى تۇيىندەدى.
جارىس سوڭىنان جەڭىمپازدار مەن جۇلدەگەرلەر ۇيىمداستىرۋشىلار تاعايىنداعان باعالى سىيلىقتارمەن ماراپاتتالدى.
شارانىڭ نەگىزگى ماقساتى دا مەشىت جاماعاتى اراسىندا دەنە شىنىقتىرۋ مەن سپورتتى، سالاۋاتتى ءومىر سالتىن ناسيحاتتاۋ. سونىمەن قاتار يسلامنىڭ ءداستۇرلى ەمەس اعىمىنىڭ جەتەگىندە جۇرگەن جاندارعا اسىل ءدىننىڭ وڭ جولىن كورسەتۋ.