سۋ تاسقىنىنان زارداپ شەككەن وڭىرلەردە سالىق مىندەتتەمەسىن ورىنداۋ مەرزىمىن ۇزارتۋ تۋرالى
بۇگىن قازاقستان رەسپۋبليكاسىنىڭ قارجى ءمينيسترى «قازاقستان رەسپۋبليكاسىنىڭ وڭىرلەرىندە سۋ تاسقىنىنان زارداپ شەككەن ادامدار ءۇشىن سالىقتىق اكىمشىلەندىرۋدى رەتتەۋدىڭ وزگە ءتارتىبىن بەلگىلەۋ تۋرالى» بۇيرىققا قول قويدى، دەپ حابارلايدى اlmaty-akshamy.kz.
بۇيرىق جاريالانعان ۋاقىتتان باستاپ قولدانىسقا ەنەدى. قۇجات توتەنشە جاعداي رەجيمى جاريالانعان وڭىرلەردە سۋ تاسقىنىنان زارداپ شەككەن ادامدار ءۇشىن سالىق مىندەتتەمەلەرىن ورىنداۋ مەرزىمىن ۇزارتۋ ماقساتىندا ازىرلەندى. جەڭىلدىكتەردى اكىمدىكتەردىڭ سۋ تاسقىنىنان زارداپ شەككەندەردىڭ تىزىمىنە ەنگىزىلگەن سالىق تولەۋشىلەر قولدانا الادى. اتالعان تۇلعالار ءۇشىن 2024 جىلعى 1 شىلدەگە دەيىن:
- تولەۋ مەرزىمى 2024 جىلعى 1 ناۋرىزدان 30 ماۋسىمعا دەيىنگى كەزەڭدە باستالاتىن، بارلىق سالىق جانە بيۋدجەتكە تولەنەتىن باسقا دا مىندەتتى تولەمدەر، سونداي-اق الەۋمەتتىك تولەمدەر بويىنشا تولەۋ كەيىنگە قالدىرىلدى؛
- 2024 جىلعى 1 ناۋرىزدان باستاپ 30 ماۋسىمعا دەيىنگى كەزەڭدە باستالاتىن سالىق ەسەپتىلىگىن تاپسىرۋ مەرزىمدەرى اۋىستىرىلدى؛
- مەرزىمىندە ورىندالماعان سالىق مىندەتتەمەسىنىڭ ورىندالۋىن قامتاماسىز ەتۋ جانە سالىق بەرەشەگىن ماجبۇرلەپ ءوندىرىپ الۋ شارالارىن قابىلداۋ توقتاتىلا تۇرادى؛
- ورىنداۋ مەرزىمى 2024 جىلعى 1 ناۋرىزدان باستاپ 30 ماۋسىمعا دەيىنگى كەزەڭدە باستالاتىن، كامەرالدىق باقىلاۋ ناتيجەلەرى بويىنشا حابارلامانى ورىنداۋ مەرزىمى ۇزارتىلدى.
سونداي-اق، سالىقتىق تەكسەرۋلەر (كەشەندى، تاقىرىپتىق، قارسى، حرونومەتراجدىق زەرتتەپ-قاراۋ) توقتاتىلا تۇرادى، بۇل رەتتە توقتاتا تۇرۋ مەرزىمى تەكسەرۋ مەرزىمىنە جانە تالاپ قويۋ مەرزىمىنە كىرمەيدى. سونىمەن قاتار زارداپ شەككەن ادامدارعا قاتىستى جاڭادان سالىقتىق تەكسەرۋدى تاعايىنداۋدى توقتاتا تۇرۋ كوزدەلگەن. ودان بولەك، ۋاقىتىلى تولەنبەگەن سالىقتار بويىنشا 2024 جىلعى 1 ناۋرىزدان 1 شىلدەگە دەيىن ءوسىمپۇلدى ەسەپتەۋ توقتاتىلا تۇرادى.
اتالعان وزگەرىستەر 2024 جىلعى 1 ناۋرىزدان باستاپ تۋىنداعان قۇقىقتىق قاتىناستارعا قولدانىلادى. سالىق تولەۋشىلەرگە مەملەكەتتىك كىرىستەر ورگاندارىنا بارۋدىڭ قاجەتى جوق، زارداپ شەككەندەردىڭ ءتىزىمى اكىمدىكتەردەن الىنادى.