مەملەكەتتىك كىرىستەر كوميتەتى بۇيرىق دايىندادى.
سۋ تاسقىنىنان زارداپ شەككەن قازاقستاندىقتارعا سالىقتار مەن تولەمدەردى تولەۋ كەيىنگە قالدىرىلادى، دەپ حابارلايدى Almaty-akshamy.kz
مەملەكەتتىك كىرىستەر كوميتەتى "قازاقستان رەسپۋبليكاسىنىڭ وڭىرلەرىندە سۋ تاسقىنىنان زارداپ شەككەن ادامدار ءۇشىن سالىقتىق اكىمشىلەندىرۋدى رەتتەۋدىڭ وزگە ءتارتىبىن بەلگىلەۋ تۋرالى" بۇيرىق دايىندادى.
قۇجاتتا جەرگىلىكتى اتقارۋشى ورگاندار سۋ تاسقىنىنان زارداپ شەككەندەردىڭ تىزىمىنە ەنگىزگەن سالىق تولەۋشىلەر ءۇشىن:
تولەۋ مەرزىمى 2024 جىلعى 1 ناۋرىزدان باستاپ 30 ماۋسىمعا دەيىنگى كەزەڭدە باستالاتىن، بارلىق سالىق جانە بيۋدجەتكە تولەنەتىن باسقا دا مىندەتتى تولەمدەر، سونداي-اق الەۋمەتتىك تولەمدەر بويىنشا تولەۋ مەرزىمىن 2024 جىلعى 1 شىلدەگە دەيىن كەيىنگە قالدىرۋ ۇسىنىلسىن؛
2024 جىلعى 1 ناۋرىزدان باستاپ 30 ماۋسىمعا دەيىنگى كەزەڭدە باستالاتىن سالىق ەسەپتىلىگىن تاپسىرۋ مەرزىمدەرى 2024 جىلعى 1 شىلدەگە اۋىستىرىلسىن؛
مەرزىمىندە ورىندالماعان سالىق مىندەتتەمەسىنىڭ ورىندالۋىن قامتاماسىز ەتۋ جانە سالىق بەرەشەگىن ماجبۇرلەپ ءوندىرىپ الۋ شارالارىن قابىلداۋ 2024 جىلعى 1 شىلدەگە دەيىن توقتاتىلا تۇرسىن؛
ورىنداۋ مەرزىمى 2024 جىلعى 1 ناۋرىزدان باستاپ 30 ماۋسىمعا دەيىنگى كەزەڭدە باستالاتىن، كامەرالدىق باقىلاۋ ناتيجەلەرى بويىنشا مەملەكەتتىك كىرىستەر ورگاندارى انىقتاعان بۇزۋشىلىقتاردى جويۋ تۋرالى حابارلامانى ورىنداۋ مەرزىمى 2024 جىلعى 1 شىلدەگە دەيىن ۇزارتىلسىن؛
كەلەسى كەزەكتە، اتالمىش مەرزىمگە دەيىن توقتاتىلادى:
- سالىقتىق تەكسەرۋلەردى (كەشەندى، تاقىرىپتىق، قارسى، حرونومەتراجدىق زەرتتەپ-قاراۋ) تاعايىنداۋ؛
- مەملەكەتتىك كىرىستەر ورگاندارى جۇزەگە اسىراتىن سالىقتىق تەكسەرۋلەر جۇرگىزۋ مەرزىمىنىڭ ءوتۋى.