كۇن جىلىعان سايىن ينفەكسيانىڭ تۇرلەرى كوبەيە تۇسەدى
ق ر دەنساۋلىق ساقتاۋ ۆيسە-مينيسترى - باس مەملەكەتتىك سانيتارلىق دارىگەرى ايجان ەسماعامبەتوۆا جۇمىس ساپارىمەن اتىراۋ وبلىسىنا باردى، دەپ حابارلايدى اlmaty-akshamy.kz.
ق ر دەنساۋلىق ساقتاۋ ۆيسە-مينيسترى ءبىر اۋىسىمدا 250 پاسيەنتتى قابىلداي الاتىن جىلىوي اۋداندىق ەمحاناسىنا، 75 ورىندىق ءمودۋلدى اۋرۋحانا مەن 150 ورىندىق اۋداندىق اۋرۋحاناعا، قۇلسارى قالاسىندا ورنالاسقان ەۆاكۋاسيالىق پۋنكتكە باردى.
ول مەديسينالىق ۇيىمداردىڭ ماتەريالدىق-تەحنيكالىق جابدىقتارىمەن، ەپيدەميولوگيالىق احۋالىمەن تانىسىپ، دارىگەرلەرمەن جانە پاسيەنتتەرمەن اڭگىمەلەستى.
اتىراۋ وبلىستىق دەنساۋلىق ساقتاۋ باسقارماسىنىڭ باسشىسى قايسار ابدالييەۆ وڭىردەگى احۋالمەن تانىستىردى.
«قۇلسارى قالاسى، قوسشاعىل ەلدى-مەكەنى، جاڭا قاراتون پوسەلكاسىندا ەۆاكۋاسيالانعان تۇرعىندارعا ءتيىستى مەديسينالىق كومەك كورسەتىلىپ جاتىر. ال شۇعىل وتا قاجەت ەتەتىن پاسيەنتتەر مەن جۇكتى ايەلدەردى بوسانۋعا بەينەۋ اۋداندىق اۋرۋحاناسىنا جولدانۋدا. اۋداندا جالپى وبلىس بويىنشا سۋ باسۋعا ۇشىراعان دەنساۋلىق ساقتاۋ نىساندارى جوق»، - دەدى قايسار ابدالييەۆ.
ەۆاكاۋاسيالىق پۋنكتپەن مەديسينالىق مەكەمەلەردە بولعان ايجان ەسماعامبەتوۆا لاستانعان سۋدان پايدا بولاتىن ينفەكسيالىق اۋرۋلاردىڭ الدىن الۋ ءۇشىن ءبىرقاتار ۇسىنىستار تاستادى.
«اۋداندى سۋدان تازالايتىن تەحنيكانىڭ سانىن كوبەيتۋ قاجەت. سەبەبى اۋا تەمپەراتۋراسى جوعارىلاعان سايىن ينفەكسيالىق ءتۇرلى اۋرۋلار پايدا بولۋى مۇمكىن. تۇرعىندارعا ءتۇسىندىرۋ جۇمىستارى جۇرگىزىلىپ، ينفەكسيالىق اۋرۋلارعا قارسى الىنۋى ءتيىس ۆاكسيناسيالاۋ تۋرالى اقپارات بەرۋ كەرەك»، - دەدى ايجان ەسماعامبەتوۆا.
بۇگىنگى تاڭدا بارلىق مەديسينالىق ۇيىمداردا سۋ باسقان ەلدى مەكەندەردە مەديسينالىق العاشقى كومەك كورسەتۋ جونىندەگى ءىس-شارالار جوسپارى، سۋ تاسقىنى كەزەڭىندە توتەنشە جاعدايلاردىڭ الدىن الۋ جانە ولاردىڭ سالدارىن جويۋ جونىندەگى جوسپارى ازىرلەندى.