قازاقستان، وزبەكستان، ازەربايجان جانە گرۋزيانىڭ ساقتاندىرۋ سالاسىنداعى ورتاق الەۋەتى ارتتى.
تاشكەنتتە 4 مەملەكەتتىڭ وكىلدەرى باس قوسىپ، «تۇران» مەموراندۋمىنا قول قويدى. قۇجات حالىقارالىق قايتا ساقتاندىرۋ سىيىمدىلىعىن 45 ملن دوللارعا دەيىن جەتكىزۋگە مۇمكىندىك بەرەدى. كەلەر جىلى بۇل كورسەتكىشتى 100 ميلليون دوللارعا جەتكىزۋ ويدا بار. يگى ىسكە ورتالىق ازيا مەن كاۆكاز ەلدەرىنىڭ جەتەكشى كومپانيالارى قوسىلدى، دەپ حابارلايدى اlmaty-akshamy.kz 24.kz-كە سىلتەمە جاساپ.
جالپى اتالعان دامۋشى نارىقتا ارزان ءارى ساپالى ساقتاندىرۋعا سۇرانىس ءوسىپ كەلەدى. وسى سەبەپتى قارجىلىق قىزمەتتى رەتتەۋشى مەكەمەلەر بۇل ىستە بىرىگۋدى ءجون دەپ تاپقان. ول ءۇشىن بىركەلكى باعا ساياساتىن ەنگىزىپ، كورسەتىلەتىن قىزمەت پەن ساپانى ۇيلەستىرەدى.
مامانداردىڭ ايتۋىنشا، قازاقستان كومپانيالارى ەندى قىمبات شەتەلدىك ساقتاندىرۋ ءپوليسىن ەمەس، ءتيىمدى شارت اياسىندا وتاندىق ونىمگە قول جەتكىزە الادى. مەموراندۋمعا الداعى ۋاقىتتا تۇركيا، قىرعىزستان تاجىكستان جانە تۇرىكمەنستان قوسىلۋعا نيەتتى.
قايسار ءابدىر، ساقتاندىرۋ كومپانياسى باسقارما ءتوراعاسىنىڭ مىندەتىن اتقارۋشى: - ەگەر جەكە نەمەسە زاڭدى تۇلعا بيزنەسىن حالىقارالىق نارىقتا كەڭەيتۋدى ويلاسا، مەموراندۋمعا قاتىسۋشى ەلدەگى كومپانيانىڭ ءبىرىڭعاي شارتتارىن قولدانا الادى. بۇل وعان ايتارلىقتاي پايدا اكەلەدى. ەگەر ورتاشا ەسەپپەن 25 مىڭ دوللاردىڭ جەكە مۇلكىن ساقتاندىرۋ قاجەت بولسا، ءبىر جىلدىق تولەم بار بولعانى 25 دوللاردىڭ شاماسىندا بولادى.