تاشكەنتتە قالىڭدىقتار شەرۋى ءوتتى

وتباسى قۇندىلىعىن كەڭىنەن ناسيحاتتاۋعا باعىتتالعان شارا. 

100-دەن استام قالىڭدىق تاشكەنت كوشەلەرىمەن ءجۇرىپ، كوپشىلىكتى ءساندى كويلەكتەرىمەن ءتانتى ەتتى، دەپ حابارلايدى Almaty-akshamy.kz «حابار 24» cىلتەمە جاساپ. 

- شارا قوعامدا وتباسى قۇندىلىعىن كەڭىنەن ناسيحاتتاۋعا باعىتتالعان. قالىڭدىقتارعا ورتالىق ساياباقتا بارىنشا جاعداي جاسالدى. اۋەزدى ءان، گۇل شوقتارى جانە ارنايى داستارحان جايىلدى. دۋماندى كەشكە كۇيەۋ جىگىتتەر دە شاقىرىلدى. زاماناۋي توي كويلەكتەرى كورسەتىلىپ قانا قويمادى، جەرگىلىكتى سالت-داستۇرگە ساي تىگىلگەن كيىم ۇلگىلەرى تانىستىرىلدى. نەگىزگى ماقسات – ەلدەگى وتباسى ينستيتۋتىن دامىتۋ، - دەيدى ۇيىمداستىرۋشىلار. 

«فەستيۆالگە ءتۇرلى مەملەكەتتەن مەيماندار كەلىپ جاتىر. قالىڭدىقتار شەرۋى شاڭىراق كوتەرىپ، وتباسىن قۇرۋدىڭ جۇبايلارعا ماڭىزدى ەكەنىن ءتۇسىندىرۋدى كوزدەيدى. قىز بالالاردىڭ ومىرىندەگى ەڭ اسەرلى ساتكە جاي عانا قاراۋعا بولمايدى. ول، بىرىنشىدەن، ءومىر بويى ەستە قالاتىن قۋانىش، ەكىنشىدەن، اسا جاۋاپتى قادام دەر ەدىم»، - دەدى شارا ۇيىمداستىرۋشىسى ادەلا باتىرگارەيەۆا.