تاشكەنت زووباعىندا كەلىنشەك كىشكەنتاي قىزىن ايۋعا لاقتىرىپ جىبەردى

ايۋ قىزعا تيىسكەن جوق، بالا بەس مەترگە جۋىق بيىكتىكتەن قۇلاعاندىقتان عانا زارداپ شەكتى

تاشكەنت زووباعىندا ايەل كىشكەنتاي قىزىن ايۋدىڭ ۆولەرىنە لاقتىرىپ جىبەردى. جىرتقىش بالاعا تيىسكەن جوق. قىز بەس مەتر بيىكتىكتەن قۇلاعاندىقتان عانا زارداپ شەكتى، دەپ حابارلايدى Almaty-akshamy.kz Sputnik سايتىنا سىلتەمە جاساپ.

«28 قاڭتاردا نەگە ەكەنى بەلگىسىز، جاس ايەل جۇرتتىڭ كوز الدىندا كىشكەنتاي قىزىن ايۋ قامالعان ۆولەرگە لاقتىرىپ جىبەردى»، – دەلىنگەن زووباقتىڭ Telegram-كانالىندا.

باسپا ءسوز قىزمەتىنىڭ اقپاراتىنشا، زۋزۋ ەسىمدى كاۆكازدىق قوڭىر ايۋ مەتالل قورشاۋدىڭ ار جاعىنان ايەلدىڭ ءىس-قيمىلىن باقىلاپ تۇرعان. سودان كەيىن اقىرىن ورعا ءتۇسىپ، قىزعا جاقىنداپ، يىسكەپ، ارتىنان كەتىپ قالعان.

«زووباق قىزمەتكەرلەرى ايۋدى ۆولەردىڭ ىشكى جاعىنا قاراي الداپ الىپ كەتتى. قىز بەس مەترگە جۋىق بيىكتىكتەن قۇلاعاندىقتان عانا زارداپ شەكتى»، – دەپ ءتۇسىندىردى زووباقتاعىلار.

ايۋ تاشكەنتكە 2017 جىلى باكۋ زووباعىنان جەتكىزىلگەن. ءوزىنىڭ قىلىعىمەن، جۇرتقا اشىقتىعىمەن بۇكىل ۇجىمنىڭ سۇيىكتى جىرتقىشىنا اينالدى.

«قازىرگى تاڭدا قۇقىق قورعاۋ ورگاندارى وقيعانىڭ سەبەپتەرىن تەرگەپ جاتىر. بالا دارىگەرلەردىڭ باقىلاۋىندا. تاشكەنت زووباعى مەديسينالىق كومەككە جۇمسالاتىن شىعىندى ءوز موينىنا الادى جانە قىزدىڭ تەزىرەك ساۋىعىپ كەتۋىن تىلەيدى»، – دەدى باسپا ءسوز قىزمەتىندەگىلەر.