جاساندى ونىمدەر "Kit Kat" جانە "Nesquik" سياقتى تانىمال برەندتەرمەن تاڭبالانعان.
شىمكەنتتە تانىمال برەندتىڭ اتىن جامىلعان قولدان جاسالعان تاتتىلەر تاركىلەندى، دەپ حابارلايدى Almaty-akshamy.kz OTYRAR-عا سىلتەمە جاساپ.
جالعان ءونىم شىمكەنتتە "ب" ج ش س كومپانياسى ارقىلى كوتەرمە ساتۋ ارقىلى تاراتىلىپتى. "Nestle S. A." كومپانياسىنىڭ وتىنىشىمەن تەكسەرۋ جۇرگىزىلگەن.
"قازىرگى ۋاقىتتا ءىس ماتەريالدارى شىمكەنت قالاسى ادىلەت دەپارتامەنتىنىڭ وندىرىسىندە جانە تاۋار بەلگىسىن زاڭسىز پايدالانعانى ءۇشىن جاۋاپتى ادامدى جازاعا تارتۋ تۋرالى شەشىم قابىلدانىپ جاتىر"، - دەلىنگەن ادىلەت مينيسترلىگىنىڭ رەسمي حابارلاماسىندا.
قۇقىق يەسىنە كەلتىرىلگەن زالالدىڭ سوماسىنا بايلانىستى تەكسەرۋ ماتەريالدارى سوتقا تاپسىرىلادى نەمەسە كىنالى ادامدى قىلمىستىق جاۋاپكەرشىلىككە تارتۋ ءۇشىن ەكونوميكالىق تەرگەۋ قىزمەتىنە بەرىلەدى.