Higgsfield AI نارىقتاعى قۇنى $1 ميللياردتان اسقان العاشقى قازاقستاندىق ستارتاپ اتاندى، - دەپ حابارلايدى aqshamnews.kz ءتىلشىسى.
Todayinfo مالىمەتىنشە، جوبانىڭ تەڭ قۇرىلتايشىسى ءارى بۇرىنعى Snap Inc كومپانياسىنداعى گەنەراتيۆ جاساندى ينتەللەكت ءبولىمىنىڭ باسشىسى الەكس ماشرابوۆ نازاربايەۆ ۋنيۆەرسيتەتىندە وتكەن شارادا رەسمي مالىمدەمە جاسادى.
Higgsfield AI - قازاقستاننان شىققان جاھاندىق جەتىستىك
Higgsfield AI ستارتاپى كەيىنگى ەكى جىل ىشىندە جوعارى ءوسىم كورسەتىپ، الەمدەگى ەڭ جىلدام دامىپ كەلە جاتقان تەحنولوگيالىق جوبالاردىڭ بىرىنە اينالدى. جوبانىڭ نەگىزىن قالاۋشىلار - جي-زەرتتەۋشى ەرزات دۋلات پەن الەكس ماشرابوۆ. ستارتاپ الەمنىڭ تۇكپىر-تۇكپىرىنەن - اقش، جۇڭگو، جاپونيا سياقتى الپاۋىت نارىقتاردان - ميلليونداعان بەلسەندى قولدانۋشىلاردى جيناپ، جاھاندىق اۋديتوريانى وزىنە قاراتتى.
كومپانيانىڭ باستى باعىتى - گەنەراتيۆ جاساندى ينتەللەكت تەحنولوگيالارىن قولدانۋ ارقىلى جاڭا ونىمدەر مەن شەشىمدەر جاساۋ. بۇل ستارتاپتىڭ ەرەكشە ءارى تارتىمدى بولۋىنىڭ باستى سەبەبى - ۆيزۋال كونتەنتتى اۆتومات تۇردە جاسايتىن، پايدالانۋشىنىڭ كرەاتيۆىن ارتتىراتىن قۇرالدار جۇيەسى.
$50 ملن تابىس جانە ۆەنچۋرلىك قولداۋ
الەكس ماشرابوۆتىڭ ايتۋىنشا، Higgsfield AI كومپانياسى جىلدىق ءتۇسىم بويىنشا $50 ميلليون مەجەسىنەن اسىپ، رەسمي تۇردە «ءجالعىزمۇيىز» مارتەبەسىن يەلەندى. بۇل جەتىستىككە 15 جىل بويى ەشبىر قازاقستاندىق كومپانيا جەتە الماعان بولاتىن.
كومپانياعا Anthropic، OpenAI سياقتى جوبالارعا قارجى سالعان Menlo Ventures سىندى بەدەلدى ۆەنچۋرلىك قورلار ينۆەستيسيا قۇيعان. سونىمەن قاتار، ايگىلى بيزنەس-انگەلدەر دە Higgsfield AI-دىڭ الەۋەتىنە سەنىم ارتىپ، $16 ميلليون كولەمىندە باستاپقى ينۆەستيسيا جاساعان.