اباي اتىنداعى قازاق ۇلتتىق وپەرا جانە بالەت تەاترى 90-شى مەرەيتويلىق ماۋسىمىن اشتى، دەپ حابارلايدى Almaty-akshamy.kz
2023 جىلى 9 جانە 10 قىركۇيەك اباي اتىنداعى قازاق ۇلتتىق وپەرا جانە بالەت تەاترىنىڭ تاريحقا تولى 90-جىلدىق مەرەيتويىنىڭ اشىلۋى ءوتتى.
1934 جىلى العاش شىمىلدىعىن اشقان اباي اتىنداعى قازۇوبت شاعىن مۋزىكالىق ستۋديادان باستاۋ الىپ، ەۋرازيا كەڭىستىگىندەگى ەڭ ۇلكەن تەاترعا اينالىپ، ۇزاق جولدى باستان كەشتى، سول سەبەپتەن دە «قازاق ونەرىنىڭ قارا شاڭىراعى» دەپ اتالۋى بەكەر ەمەس.
تەاتر ماۋسىمىن 9 قىركۇيەك كۇنى داستۇردەن جاڭىلماي احمەت جۇبانوۆ پەن لاتيف ءحاميديدىڭ «اباي» وپەراسىمەن اشتى.
باستى پارتيالاردى ق ر ەڭبەك سىڭىرگەن قايراتكەرى تالعات كۇزەمبايەۆ، ۆەنەرا الپىسبايەۆا، نۇرجان باجەكەنوۆ، ەسەنگەلدى رزا، ق ر ەڭبەك سىڭىرگەن قايراتكەرى بولات بوكەنوۆ سومدايدى.
ال، 10 قىركۇيەك كلاسسيكالىق بي ونەرىنىڭ سيمۆولى پ. چايكوۆسكييدىڭ «اققۋ كولى» بالەتى كورەرمەن نازارىنا ۇسىنىلدى. باستى پارتيالاردى اباي ات. قازۇوبت جەتەكشى بالەت ارتىستەرى ماليكا ەلچيبايەۆا، نەلسون پەنيا، ازامات اسقاروۆ سومدادى.
مەرەيتويلىق ماۋسىم مادەني ومىردەگى قىزىقتى ءارى ماڭىزدى وقيعالارعا تولى بولادى. كورەرمەندەردى ءبىرقاتار پرەمەرالار، فەستيۆالدار مەن گاسترولدەر كۇتۋدە. ايتا كەتسەك، قازان ايىنىڭ 26-27 كۇندەرى اباي اتىنداعى قازاق ۇلتتىق وپەرا جانە بالەت تەاترى گاسترولدىك ساپارمەن اباي ەلىنە، سەمەي قالاسىنىڭ تۇرعىندارى مەن قوناقتارىن ءوزىنىڭ قويىلىمدارىمەن قۋانتپاق. ال، 21-22 قازاندا تەاتر سىدىق مۇحامەدجانوۆتىڭ «جۇمباق قىز» ەپيكالىق وپەراسىنىڭ تۇساۋكەسەرىن ۇسىنادى، ول 1971 جىلى ساحنادا العاش رەت قويىلعان سپەكتاكلدىڭ جاڭا باعىتتاعى جاڭعىرۋىنىڭ ءبىر ءتۇرى بولىپ تابىلادى.
اباي اتىنداعى قازاق ۇلتتىق وپەرا جانە بالەت تەاترى - قازاقستاننىڭ ۇلتتىق قازىناسى مەن ماقتانىشى، قازاق وپەرا جانە بالەت ونەرىنىڭ التىن بەسىگى ەلىمىزدىڭ جانە حالقىمىزدىڭ تاريحىنىڭ التىن شەجىرەسىنە ماڭگىلىككە ەندى، ويتكەنى ءدال وسى تەاتردىڭ قۇرىلۋى قازاق مۋزىكاسىنداعى كوپتەگەن مۋزىكالىق جانرلاردىڭ دامۋىنا، كومپوزيتورلىق، ۆوكالدىق، ورىنداۋشىلىق، حورەوگرافيالىق جانرلاردىڭ قۇرىلۋىنا قۋاتتى تۇرتكى بولدى. ال تەاتر عيماراتىنىڭ قۇرىلىسى ۇلتتىق ارحيتەكتۋرانىڭ دامۋىندا جاڭا كوكجيەكتەر اشتى.
1934 جىلدىڭ 13 قاڭتارىندا اشىلعان العاشقى كۇندەرىنەن باستاپ ول قازاق حالقىنىڭ ۇزدىك داستۇرلەرىن ساقتايتىن حالىققا قولجەتىمدى مۋزىكالى – ساحنالىق الاڭ رەتىندە قالىپتاستى. 90 جىلدىق تاريحىندا تەاتردا 300-دەن استام شىعارما قويىلدى. بۇل قازاق وپەرالارى مەن بالەتتەرىمەن قاتار، ورىس، باتىس ەۋروپا وپەرا كلاسسيكتەرىنىڭ جاۋھارلارى.