مۇرات اۋەزوۆتىڭ 80 جاسقا تولۋىنا وراي حالىقارالىق عىلىمي كونفەرەنسيا ءوتتى
اۋەز اۋلەتىنىڭ عانا ەمەس، الاشتىڭ اماناتىن ارقالاعان مۇرات اۋەزوۆ بيىل سەكسەننىڭ سەڭگىرىندە. سوعان وراي، قارا شاڭىراق قازۇۋ-داعى ءال-فارابي كىتاپحاناسىندا مەملەكەت جانە قوعام قايراتكەرى، كورنەكتى قالامگەر، مادەنيەتتانۋشى عالىم، ديپلومات ءارى فيلولوگيا عىلىمىنىڭ دوكتورى، پروفەسسور مۇرات مۇحتار ۇلىنىڭ 80 جاسقا تولۋىنا ارنالعان اۋقىمدى مادەني ءھام عىلىمي جيىن وتكەن بولاتىن.
م.اۋەزدىڭ مەرەيلى جاسىنا ارنالعان «تاريحي-مادەني ۇدەرىستەگى ساباقتاستىق» اتتى حالىقارالىق عىلىمي-تاجىريبەلىك كونفەرەنسياعا الىس-جۋىق شەتەلدەن ءبىرتالاي قوناق ات ارىتىپ كەلىپ وي ءبولىستى. سول قاتاردا عالىمنىڭ عىلىمداعى ساپتاستارى، ادەبيەتتەگى قالامداستارى، ومىردەگى جورا-جولداستارى مەن وتباسىنداعى جاناشىر جاقىندارى دا بولدى. ولار ءقادىرلى قايراتكەردى مەرەيتويىمەن قۇتتىقتاپ، وزدەرىنىڭ جۇرەكجاردى لەبىزىن ارنادى، ءارى ەڭبەك جانە ءومىر جولىنا ايرىقشا باعالارىن بەردى.
اۋقىمدى ءىس-شارانىڭ رەسمي ءبولىمىن ءال-فارابي اتىنداعى قازۇۋ رەكتورى جانسەيت تۇيمەبايەۆ ارنايى قۇتتىقتاۋ سوزبەن اشتى. قايراتكەر عالىمنىڭ ءومىرى مەن ەڭبەك جولىنا، اتقارعان ابىرويلى قىزمەتتەرىنە جوعارى باعا بەرگەن جانسەيت قانسەيت ۇلى ءسوزىنىڭ سوڭىندا سالتقا ساي ءبىلىم ورداسىنىڭ اتىنان مۇرات مۇحتار ۇلىنىڭ يىعىنا شاپان جاۋىپ، سىي-سياپاتىن تابىستادى. القالى توپتىڭ الدىندا تۇركسوي حالىقارالىق ۇيىمىنىڭ قولداۋىمەن جارىق كورگەن مۇرات مۇحتار ۇلىنىڭ تۇرىك تىلىندەگى «Birliktelik» (بىرلىك) كىتابىنىڭ تۇساۋى كەسىلدى.
بۇدان كەيىن كەزەك تيگەن قالا اكىمدىگىنىڭ وكىلى دە سوعان ۇقساس ءىلتيپاتىن ءبىلدىردى. سىي-سياپاتتار وسىدان كەيىنگى بارلىق قۇتتىقتاۋ سوزدەرىمەن بىرگە مەرەيتوي يەسىنىڭ قولىنا تابىستالدى. سولاردىڭ اراسىندا تاتارستان جازۋشىلار وداعىنىڭ ءتوراعاسى ركايل زايدۋللين تابىستاعان ايرىقشا سىيلىق تا بولدى. مادەني-ادەبي تاريحىمىزدا ايرىقشا اتالاتىن ايگىلى «قازان» باسپاسىندا باسىلعان «قۇران-كارىمدى» تاتار قالامگەرلەرى اتىنان تابىستاعان ركايل زايدۋللين ءوزىنىڭ انا تىلىندە، تەبىرەنىسكە تولى بايانداماسىن دا جاسادى. «رۋحي ءايدامان» دەپ اتالعان بايانداماسىنان باۋىرلاس ۇلتتاردىڭ ورتاق ءۇنى، ىستىق پەيىلى اڭقىپ تۇردى.
قۇتتىقتاۋ ءسوزدىڭ مىنبەرىندە تۇركسوي حالىقارالىق ۇيىمىنىڭ باس حاتشىسى، قىرعىز اعايىن اتىنان سۇلتان رايەۆ، وزبەك اعايىن اتىنان سافار ابدۋللو، نيدەرلاندى جۇرتىنان جەتكەن كۇيەۋ بالاسى روبەرت ەرمەرس قاتارلى شەتەلدىك قوناقتار، مارات سەمبى سىندى قاتارلاس قالامگەرلەر دە بولدى.
ءتۇس الەتىنەن كەيىن شارانىڭ عىلىمي ءبولىمى شىمىلدىق اشىپ، «تاريحي-مادەني ۇدەرىستەگى ساباقتاستىق» تاقىرىبىندا قوس سەسسيادان تۇراتىن تالقىلاۋ وتىرىسى ءوتتى. العاشقى سەسسيانى عالىم اكەنىڭ جولىن جالعاعان اۋەزوۆا زيفا-الۋا مۇرات قىزى باستاپ اشتى. وندا رەسەي، قىرعىزستان، وزبەكستان، نيدەرلاندى، تۇركيا قاتارلى ەلدەردەن جەتكەن جانە وتاندىق زەرتتەۋشىلەر، شىعىستانۋشى، مادەنيەتتانۋشى عالىمدار قاتىستى. ولار م.اۋەزوۆتىڭ عىلىمداعى، ادەبيەت پەن ونەردەگى جانە ديپلوماتياداعى ەڭبەكتەرىن ءتۇرلى جاعىنان تالدادى.
ايتا كەتەيىك، مۇرات اۋەزوۆتىڭ مەرەيلى 80 جاسى قاڭتاردان بەرى رەسپۋبليكامىز كولەمىندە اتالىپ ءوتىپ كەلەدى.