بۇگىن الماتىداعى 28 گۆاردياشى-پانفيلوۆشىلار ساياباعىندا 1 قازان – حالىقارالىق قارتتار كۇنىنە ارنالعان سالتاناتتى ءىس-شارا ءوتتى.
مەدەۋ اۋدانى اكىمدىگى، «الماتى جاس دارىگەرلەر قاۋىمداستىعى» قوعامدىق بىرلەستىگى، بەلسەندى ءومىر ءسۇرۋ ورتالىعى مەن ارداگەرلەر كەڭەسى ۇيىمداستىرعان مەرەكەلىك كەشكە مەدەۋ اۋدانى اكىمىنىڭ ورىنباسارى ايدوس نارلىبايەۆ، بەلسەندى ءومىر ءسۇرۋ ورتالىعىنىڭ ۇيلەستىرۋشىسى باقتيار كامالوۆ، قالا زەينەتكەرلەرى، ارداگەرلەر كەڭەسى مەن اتالمىش ورتالىقتىڭ مۇشەلەرى قاتىستى.
مەرەكەلىك كەش قارتتارىمىزدىڭ كوڭىل-كۇيىن كوتەرىپ، ولاردى ءبىر مارقايتىپ تاستادى. اشىق اسپان استىندا اۋەزدى اندەر شىرقالىپ، كۇمبىرلەگەن كۇيلەر ورىندالدى. ۇلتتىق كيىممەن ەرەكشەلەنگەن «دۋمان سازى» ءانسامبلىنىڭ مۇشەلەرى «قازاقى داستارحانىم» ءانىن ورىنداسا، اقىنجاندى انالار مەرەكەگە ارناپ ولەڭدەرىن وقىدى، بارلىعى بىرگە فلەشموب بيلەدى. اق شاعالاداي كيىنگەن اتا-اجەلەرىمىز سكانديناۆيالىق جۇرىستەن جارىسقا قاتىسىپ، باقتارىن سىنادى. سونىمەن قاتار، قولونەر كورمەلەرى ۇيىمداستىرىلدى.
سالتاناتتى ءىس-شارا توسىن سىيلارعا تولى بولدى. «كەرەمەت سۋ» جانە سكە Samalsy كومپانيالارى قاريالارعا تەگىن سۋ تاراتىپ، «A&D KZN» كومپانياسى قارتتارعا تەگىن قان قىسىمىن ولشەيتىن قۇرالدار تارتۋ ەتتى.
اعا بۋىن وكىلدەرىنىڭ ومىرلىك تاجىريبەلەرى مەن اقىل-كەڭەستەرى ءبىز ءۇشىن قاشاندا قىمبات. قازىنالى قارتتار تەك وتباسىنىڭ ەمەس، بۇكىل ەلدىڭ اقىلشىسىنا اينالىپ، ولاردىڭ ءسوزى ەل ىشىندەگى ماڭىزدى ماسەلەلەردى شەشۋدە زور مانگە يە.
200-گە جۋىق قارت قاتىسقان مەرەكەلىك ءىس-شارا كونسەرتتىك باعدارلامالارمەن جالعاستى. كەش سوڭىندا قاتىسۋشىلار ۇيىمداستىرۋشىلارعا تاماشا كوڭىل-كۇي سىيلاعاندارى ءۇشىن العىستارىن ءبىلدىردى.
تاقىرىپقا وراي
باقتيار كامالوۆ،
مەدەۋ اۋدانى «بەلسەندى ءومىر ءسۇرۋ ورتالىعىنىڭ» ۇيلەستىرۋشىسى:«ۇلكەنگە – قۇرمەت، كىشىگە – ىزەت» دەگەن اتالى ءسوزدى ۇرپاعىنىڭ بويىنا سىڭىرگەن، قارياسىن قادىرلەپ، ارداگەرىن ارداقتاعان ەلمىز. قارتىن سىيلاپ، باتاسىن العان ۇرپاقپىز. سوندىقتان بىزگە تاجىريبەسى مول اعا بۋىننىڭ ءومىر جولى قاشاندا ۇلگى. مەدەۋ اۋدانى اكىمدىگى «بەلسەندى ءومىر ءسۇرۋ ورتالىعىمەن» بىرگە جىلدا وسىلاي قارتتار كۇنىن ءوز دەڭگەيىندە اتاپ وتەدى. بۇل مەرەكە اۋدانىمىزدا ءبىر ايعا جالعاسادى. بۇگىنگى مەرەكە سانالى عۇمىرلارىن وتان دەپ، تىنىمسىز ەڭبەكتەرىمەن مەملەكەتىمىزدىڭ نەگىزىن سالۋعا جول اشقان الدىڭعى بۋىن اعا-اپالارىمىزعا ارنالعان. ولاردىڭ ءومىر جولدارى بۇگىنگى ۇرپاققا ۇلگى.
ءشاربانۋ نۇرعالي قىزى،
ارداگەرلەر كەڭەسىنىڭ سپورتتىق كوميسسيا ءتورايىمى:حالىقارالىق دەڭگەيدە اتاپ وتىلەتىن بۇل مەرەكەنىڭ ەلىمىز ءۇشىن ماڭىزى زور. «قارتىن سىيلاعان ەلدىڭ قازىناسى مول بولادى» دەگەن قازاق ءار ۋاقىتتا قارتتارىن قۇرمەتتەپ وتكەن. بۇگىنگىدەي جايماشۋاق كۇندە بىزگە ەرەكشە كوڭىل ءبولىپ جاتقان الماتى قالاسى اكىمدىگىنە جانە مەدەۋ اۋدانى اكىمدىگىنە العىس ايتامىز.
سارا دۇيسەكوۆا،
«A&D KZN» كومپانياسىنىڭ ديرەكتورى:ءبىز ارداگەرلەرىمىزگە قولداۋ كورسەتىپ، العىسىمىزدى ءبىلدىرۋ ءۇشىن ەرەكشە قايىرىمدىلىق شاراسىن وتكىزۋدى ءجون كوردىك. 1 قازان – الماتى قالاسىنىڭ ارداگەرلەر كەڭەسىمەن بىرلەسىپ، ۇلى وتان سوعىسىنىڭ بارلىق ارداگەرلەرىنە جوعارى ساپالى قان قىسىمىن ولشەيتىن قۇرالداردى سىيعا تارتتىق. بۇل قۇرالدار دەنساۋلىقتى جانە جۇرەك جۇمىسىن باقىلاۋعا كومەكتەسەدى. AND كومپانياسى سالاۋاتتى ءومىر سالتىن قولدايدى جانە قوعام دەنساۋلىعىن جاقسارتۋعا ءارقاشان دايىن.
گۇلنار تولەگەن قىزى،
«بەلسەندى ءومىر ءسۇرۋ ورتالىعىنىڭ» ۇيلەستىرۋشى-كوورديناتورى:
قاريالار – تاۋسىلمايتىن قازىنا
ورتالىعىمىزدا 380-گە تارتا مۇشە بار. كەلۋشىلەردىڭ جاس ايىرماشىلىعى ءارتۇرلى. ەڭ ۇلكەنى - 85 جاستا، كىشىسى 60-تان اسقان. مۇندا ەشكىم ءوزىن زەينەتكەرمىن دەپ سەزىنبەيدى. اپالارىمىز وتە بەلسەندى. اپتانىڭ بەس كۇنىندە دە ءتۇرلى ءىس-شارالار ۇيىمداستىرىلاتىندىقتان، ورتالىقتىڭ تىرشىلىك قازانى قايناپ جاتادى. ءتورت جەردە لوكاسيامىز بار. مەدەۋ اۋدانى اكىمدىگىنىڭ ۇيىمداستىرۋىمەن بۇل جەرگە ءبىز جىلدا كەلىپ، وسىنداي مەرەكەلىك شارالار وتكىزەمىز.
بەلسەندىلىك تانىتىپ، ۇنەمى كوڭىلدى كەشتەر وتكىزىپ جۇرگەن سوڭ بىزگە اۋدان اكىمشىلىگى 24 ۇلتتىق كيىم سىيلادى. «دۋمان سازى» دەگەن ءانسامبلىمىز بار. مۇنداي قامقورلىقتى ارداگەرلەرگە جاسالعان قۇرمەت دەپ بىلەمىز.
مىنە، مۇندا ورتالىق مۇشەلەرىنىڭ وزدەرى جاساعان بۇيىمدارىنان كورمە ۇيىمداستىرىلدى. ءبىز سونداي-اق، قالا كىتاپحانالارىمەن، ورتالىق مۇراجايلارمەن تىكەلەي شىعارماشىلىق بايلانىستامىز.
قازىرگى تاڭدا ەلىمىزدە قارتتارعا كوڭىل ءبولىپ، ۇكىمەت تاراپىنان جان-جاقتى قامقورلىق جاسالۋدا. وعان ريزامىز. سوندىقتان ەلىمىزدىڭ وركەندەۋىنە، ۇرپاقتارىنىڭ جارقىن كەلەشەگىنە تىلەكشى قارتتارىمىزدىڭ ارامىزدا وسىلاي بەلسەندىلىك تانىتىپ، امان-ساۋ جۇرگەنى ءبىز ءۇشىن ۇلكەن قۋانىش. بارلىق اعا بۋىن وكىلدەرىن بۇگىنگى مەرەكەلەرىمەن قۇتتىقتايمىن، دەندەرى ساۋ، عۇمىرلارى ۇزاق بولسىن!
شوپان الييەۆ،
«دۋمان» ىقشاماۋدانىنداعى «بەلسەندى ءومىر ءسۇرۋ ورتالىعىنىڭ» سكانديناۆيالىق ءجۇرىس جاتتىقتىرۋشىسى:
دەنساۋلىعىمىز جاقسى، كوڭىلىمىز كوتەرىڭكى!
ورتالىقتا 300-دەن استام مۇشەمىز بار. ول جەردە سپورتتىڭ بىرنەشە ءتۇرى، بي، قولونەر، كومپيۋتەرلىك ساۋاتتىلىق، ءتىل ۇيرەنۋ سەكىلدى كوپتەگەن ۇيىرمەلەر بار. سوندىقتان ورتالىقتىڭ ءبىز ءۇشىن ورنى ەرەكشە.
جىگىتتەر بيليارد وينايمىز، قىزدارىمىز يوگاعا قاتىسىپ جاتادى. ءتۇرلى ءىس-شارالارعا قاتىسىپ، ءانىمىزدى ايتىپ، ءبيىمىزدى بيلەيمىز. جاس شامامىز قاتار بولعان سوڭ شىعار، ءبىر-بىرىمىزدى جاقسى تۇسىنەمىز. بارلىعى ويىمىزداعىداي بولعان سوڭ، دەنساۋلىعىمىز جاقسى، كوڭىل-كۇيىمىز كوتەرىڭكى!
ودان ارتىق نە كەرەك! ەلىمىز امان، جۇرتىمىز تىنىش بولسىن! بارلىعىڭىزعا جاقسىلىق تىلەيمىن!
رىسالدى احمەتوۆا،
بەلسەندى ءومىر ءسۇرۋ ورتالىعىنىڭ مۇشەسى:
جاقسى دوستار تاپتىم
جاسىم 71-دە. ورتالىققا بەس جىلدان بەرى كەلىپ ءجۇرمىن. سكانديناۆيالىق جۇرىسكە قاتىسىپ كەلە جاتقانىما دا بەس جىلعا جۋىقتادى. اعىلشىن ءتىلىن ۇيرەنىپ جاتىرمىز، بيگە قاتىسىپ ءجۇرمىز. ءقازىر قۇربىلارىمىزبەن بىرگە ەكى اينالىم جۇگىرۋدەن جارىس بولادى. سوعان قاتىسامىز. سپورتتىڭ بۇل ءتۇرى دەنساۋلىققا وتە پايدالى ەكەن.
بۇرىن ءجيى-جيى اۋىرىپ قالاتىنمىن. ءقازىر ول كۇندەر ۇمىت بولدى. ۋاقىتىمىزدى كوڭىلدى ءارى ءتيىمدى وتكىزەمىز.
جاقسى دوستار تاپتىق. ءبىز سياقتى ۇلكەن كىسىلەرگە بۇل ورتالىق وتە قاتتى ۇنايدى. وسىنداي قامقورلىق تانىتىپ، جاعداي جاساپ جاتقان مەملەكەتىمىزگە راحمەت ايتامىز.