Facebook تالىپتەردىڭ پاراقشاسىن بۇعاتتاۋدى كوزدەۋدە.
Facebook الەۋمەتتىك جەلىسى «تاليبان» قوزعالىسىن تەرروريستىك ۇيىم دەپ سانايتىنىن راستادى، سوندىقتان تالىپتەردى قولدايتىن مازمۇنداعى اقپاراتتى تاراتۋعا جانە جاريالاۋعا تىيىم سالعان، دەپ حابارلايدى Almaty-akshamy.kz.
قازاقستاندا «تاليبان» قوزعالىسىنا جوعارعى سوتتىڭ 2005 جىلعى 15 ناۋرىزداعى شەشىمىمەن تىيىم سالىنعان. كومپانيا «حالىقارالىق قاۋىمداستىق شەشىمىن» قولدايتىنىن مالىمدەدى. «تاليبان» قوزعالىسىنا اقش زاڭىنا سايكەس تەرروريستىك ۇيىم رەتىندە سانكسيالار سالىنعان. سوندىقتان Facebook ءقاۋىپتى ۇيىمدارعا قاتىستى ساياساتقا سايكەس پلاتفورمانى پايدالانۋعا تىيىم سالعان.
«بۇل تالىپتەر باسقاراتىن نەمەسە ولاردىڭ اتىنان جۇمىس ىستەيتىن پاراقشالاردى بۇعاتتايمىز جانە ولاردى دارىپتەۋگە، قولداۋعا جانە تانىستىرۋعا تىيىم سالامىز دەگەن ءسوز»، - دەدى كومپانيا وكىلى.
ول Facebook-تە «تاليبانعا» قاتىستى مازمۇنداعى اقپاراتتى باقىلاۋ جانە جويۋ ءۇشىن ساراپشىلاردىڭ ارنايى توبى بار ەكەنىن باسا ايتتى. بۇل ساياسات Facebook پلاتفورمالارىنا قاتىستى، اسىرەسە، Instagram مەن WhatsApp.