تالىپتەر توي كەزىندە ادامدارعا وق اتتى

اتىس كەزىندە 13 ادام قازا تاپقانى حابارلاندى

 «تاليبان» سودىرلارى توي كەزىندە مۋزىكا ويناعانى ءۇشىن وق اتتى. بۇل تۋرالى Afghan Voice Agency اگەنتتىگى حابارلادى، دەپ جازدى Baq.kz.

اۋعانستاننىڭ بۇرىنعى ۆيسە-پرەزيدەنتى امرۋللا سالەح ەل بيلىگىن باسىپ العان «تاليبان» راديكالدى قوزعالىسىنىڭ سودىرلارى نانگارحار پروۆينسياسىندا توي ۇستىندە 13 ادامدى اتىپ تاستادى دەپ ايىپتادى.

«تاليبان» سودىرلارى نانگارحارادا ءوتىپ جاتقان تويدا مۋزىكانىڭ ءۇنىن ءوشىرۋ ءۇشىن 13 ادامدى اتىپ تاستادى. ءبىز اشۋىمىزدى قۇر ايىپتاۋمەن جەتكىزە المايمىز. بۇل رەجيم كوپكە بارمايدى، وكىنىشكە قاراي ول كۇيرەگەنگە دەيىن اۋعان حالقى ودان زارداپ شەگەدى»،-دەپ جازدى ول Twitter-دەگى پاراقشاسىندا. 

سونىمەن قاتار ول پاكىستان بيلىگىن تالىپتەرگە كومەكتەسىپ وتىر دەپ تاعى ايىپتادى. 

Afghan Voice Agency اگەنتتىگىنىڭ مالىمەتىنشە، اتالعان جاعداي  جۇما كۇنى كەشكە سۋرحرۋد ۋەزىندە بولعان. «تاليبان» سودىرلارى توي كەزىندە مۋزىكا ويناپ تۇرعاندىقتان وق اتقان. اگەنتتىكتىڭ دەرەككوزى بەرگەن مالىمەت بويىنشا، اتىس كەزىندە ەكى ادام قازا تاۋىپ، ون شاقتىسى جاراقات العان.
ءوز كەزەگىندە «تاليبان» وكىلى، ۋاقىتشا اۋعان بيلىگىنىڭ اقپارات جانە مادەنيەت ءمينيسترىنىڭ ورىنباسارى زابيحۋللا مۋدجاحيد Twitter-دەگى پاراقشاسىنا اتالعان جاعدايعا قاتىستى تۇسىنىك بەردى.

«وزدەرىن «تاليبان» وكىلى رەتىندە تانىستىرعان ءۇش ادام تويداعى مۋزىكانى توقتاتۋ  جونىندە ەسكەرتۋ جاساعان، كەيىن ولارعا وق اتقان. سونىڭ سالدارىنان ءۇش ادام قازا تاۋىپ، بىرنەشە جەرگىلىكتى تۇرعىن جارالانعان. قىلمىس جاسادى دەگەن ەكى كۇدىكتى ۇستالدى، ولار شاريعات زاڭى بويىنشا جازالانادى»،-دەپ جازدى مۋدجاحيد.