تالدىقورعاندا ءۇش جاسار بالانى ولتىرگەن كۇتۋشى سوتتالدى

تەرگەۋ بارىسىندا بالا بىرنەشە رەت سوققىعا جىعىلعانى انىقتالعان.

تالدىقورعاندا ءۇش جاسار بالانى ولتىرگەن بالا كۇتۋشىگە قاتىستى ۇكىم شىقتى، دەپ حابارلايدى اlmaty-akshamy.kz جەتىسۋ وبلىسى سوتىنىڭ باسپا ءسوز قىزمەتىنە سىلتەمە جاساپ.

ايتا كەتەيىك، وقيعا بىلتىر كۇزدە جەتىسۋ وبلىسىندا بولعان ەدى. ءۇش جاسار بالا ءبىر جاسار ىنىسىمەن بالا كۇتۋشىنىڭ قاراۋىندا بولعان. بالالاردىڭ اناسىنىڭ سوزىنشە، 12 قىركۇيەكتە بالا كۇتۋشى حابارلاسىپ، بالانىڭ جاعدايى ناشارلاپ كەتكەنىن ايتقان.

بالا اۋرۋحاناعا جەتكىزىلىپ، جان تاپسىرعان. دارىگەرلەر بالانىڭ دەنەسىندە ساۋ جەرى بولماعانىن، باس جاراقاتىن انىقتاعان.

تەرگەۋ بارىسىندا بالا بىرنەشە رەت سوققىعا جىعىلعانى انىقتالعان.

وبلىس سوتىنىڭ باسپا ءسوز قىزمەتىنىڭ مالىمەتىنشە، قىلمىستىق ءىس جابىق سوت وتىرىسىندا قارالدى، سەبەبى ءىستىڭ ءمان-جايى جاريا ەتىلمەيدى.

«بۇرىن سوتتالماعاندىعىنا بايلانىستى، شىن جۇرەكتەن وكىنۋ، جابىرلەنۋشىنى كەشىرۋ جانە كىنانى اۋىرلاتاتىن ءمان-جايلاردىڭ بولماۋى سەكىلدى كىنانى جەڭىلدەتەتىن جاعدايلاردى ەسكەرە وتىرىپ سوت سوتتالۋشىعا ورتاشا قاۋىپسىزدىك قىلمىستىق-اتقارۋ جۇيەسى مەكەمەسىندە 10 جىلعا باس بوستاندىعىنان ايىرۋ جازاسىن تاعايىندادى»، - دەلىنگەن سوت ۇكىمىندە.