تالدىقورعاندا وندىرىستىك باتارەيالار شىعاراتىن جاڭا زاۋىت سالىنادى

كاسىپورىنعا 120 ادام جۇمىسقا ورنالاستىرىلادى.

تالدىقورعاندا ماماندار ستاسيونارلىق اككۋمۋلياتور باتارەيالارىن شىعاراتىن زاۋىت سالۋعا نيەتتەنىپ وتىر. وعان 3،2 ملرد تەڭگە ينۆەستيسيا تارتىلىپ، كاسىپورىنعا 120 ادام جۇمىسقا ورنالاستىرىلادى، دەپ حابارلايدى Almaty-akshamy.kz.

«الماتى وبلىسىنىڭ اكىمى قانات بوزىمبايەۆ وسى جوباعا قاتىستى كومپانيا وكىلدەرىمەن كەزدەسىپ، مەموراندۋمعا قول قويدى»، - دەلىنگەن الماتى وبلىسى اكىمىنىڭ باسپا ءسوز قىزمەتىنىڭ حابارلاماسىندا.

وبلىس اكىمىنىڭ سوزىنە جۇگىنسەك، تالدىقورعان ماشينا جاساۋدىڭ ەكسپورتقا باعىتتالعان ونىمدەرىن شىعارۋدىڭ ورتالىعىنا اينالدى.

«بۇل جوبانى جۇزەگە اسىرۋ ءۇشىن ءبىز قاجەتتى بارلىق ينفراقۇرىلىممەن قامتاماسىز ەتەتىن بولامىز. ينۆەستورلار ءوز تاراپىنان وندىرىستىك قورعاسىندى-قىشقىلدى باتارەيالار شىعارۋداعى تەحنولوگيا ترانسفەرتتەرىن ىسكە اسىرىپ، جەرگىلىكتى تۇرعىندارعا جۇمىس بەرەدى. سونىمەن بىرگە قازاقستاندىق تاۋارلاردى، جۇمىستار مەن قىزمەتتەردى بارىنشا مول پايدالاناتىن بولادى. ۇسىنىستارىڭىز بولسا، سىزدەردى تىڭداۋعا ءازىرمىن»، - دەدى قانات بوزىمبايەۆ.

ءوز كەزەگىندە «Asma Industrial» ج ش س باسشىسى سەرىك اجماعامبەتوۆ جوبانىڭ ەرەكشەلىگىنە توقتالىپ، الداعى جوسپارلارى تۋرالى قىسقاشا ايتىپ بەردى.

«ءبىزدىڭ باتارەيالار تەلەكوممۋنيكاسيادا، ەنەرگەتيكادا، تەمىر جولدا، جاڭارتىلعان ەنەرگيا كوزدەرىن پايدالانۋعا قولدانىلادى. ءونىمدى وتكىزۋ نارىعى قازىردەن انىقتالدى. پوستكەڭەستىك ەلدەر، ازيا مەملەكەتتەرى، ەۋروپانىڭ ءبىرقاتار ەلدەرى ونىمدەرىمىزدى الۋعا دايىن. شىعىس ونەركاسىپ ايماعىنان زاۋىت سالۋعا قاجەتتى جەر ساتىپ الدىق. زاۋىتقا ورناتاتىن قۇرال-جابدىقتارىمىز تۇگەل، «قاينار اكب» بازاسىندا دايىندالعان ماماندارىمىز بار. ماتەريالدىق-كادرلىق مۇمكىندىكتەرىمىز جەتكىلىكتى بولعاندىقتان، جاڭا كاسىپورىندى تابىستى جۇرگىزەمىز دەپ سەنەمىن، - دەدى سەرىك اجماعامبەتوۆ.

كەزدەسۋ بارىسىندا ايتىلعانداي، جوبانى ىسكە اسىرۋ ءۇشىن قاجەتتى قوسالقى ەلەكتر ستانساسىنىڭ، كارىز جۇيەسىنىڭ،  زاۋىت شەكاراسىنا دەيىن گاز قۇبىرىن تارتۋ سياقتى ينفراقۇرىلىمدىق ماسەلەلەردى شەشۋگە وبلىس اكىمدىگى تولىقتاي قولداۋ كورسەتەدى.

«الماتى وبلىسىنىڭ سۋ، جەل، كۇن ەنەرگياسىن وندىرۋگە تابيعي مۇمكىندىگى مول. ال جاڭا زاۋىت شىعارعالى وتىرعان باتارەيالار سول جاڭارعان ەنەرگيا كوزدەرىن بويىنا جيناقتاپ، ەلەكتر قۋاتىنىڭ اۋا رايىنا تاۋەلدىلىگىن ازايتۋعا مۇمكىندىك بەرەدى. سوندىقتان بۇل جوبانىڭ بولاشاعى زور. بۇل سالانى دامىتۋ ەل ەكونوميكاسىنا جاڭا سەرپىن بەرەدى»، - دەپ اتاپ ءوتتى قانات بوزىمبايەۆ.