سالتاناتتى راسىمگە قاتىسۋشىلار يۆان پانفيلوۆتىڭ بيۋستىنە گۇل شوقتارىن قويدى.
تالدىقورعان گارنيزونىنىڭ دەسانتتىق-شابۋىلداۋ قۇراماسىندا كەڭەس وداعىنىڭ باتىرى، گەنەرال-مايور يۆان پانفيلوۆتىڭ ءبيۋستىنىڭ اشىلۋ ءراسىمى ءوتتى، دەپ حابارلايدى Almaty-akshamy.kz.
ونى سالتاناتتى جاعدايدا قورعانىس ءمينيسترىنىڭ ورىنباسارى، گەنەرال-مايور مۇحامەدجان تالاسوۆ پەن مەملەكەتتىك اسكەري-تاريحي مۋزەيى الماتى فيليالىنىڭ باستىعى، اتاقتى قولباسشىنىڭ نەمەرەسى الۋا بايقاداموۆا اشتى.
«قازاقستاندىق اسكەري قىزمەتشىلەردىڭ بىرنەشە بۋىنى ءۇشىن يۆان ۆاسيليەۆيچ پانفيلوۆ اڭىزعا اينالعان، جانقيار ەرلىكتىڭ جانە وتانىن شەكسىز سۇيگەن پەرزەنتتىڭ ۇلگىسى بولىپ قالا بەرەدى»، – دەپ اتاپ ءوتتى قورعانىس ءمينيسترىنىڭ ورىنباسارى، گەنەرال-مايور مۇحامەدجان تالاسوۆ
قورعانىس مينيسترلىگى باسپا ءسوز قىزمەتىنىڭ حابارلاۋىنشا، شاراعا رەسەيدىڭ ماسكەۋ وبلىسى ۆولوكالامسك قالالىق وكرۋگىنىڭ باسشىسى ميحايل سىلكا، جەتىسۋ وبلىسى مەن تالدىقورعان قالاسى اكىمشىلىگىنىڭ وكىلدەرى، اسكەري بولىمدەردىڭ كومانديرلەرى، قارۋلى كۇشتەر مەن اۋعان سوعىسىنىڭ ارداگەرلەرى قاتىستى.
«الماتى وبلىسىنىڭ اۋماعىندا ورنالاسقان دەسانتتىق-شابۋىلداۋ قۇراماسى يۆان پانفيلوۆ ەسىمىمەن اتالادى. ءدال وسى جەردە 1941 جىلدىڭ جازىندا ەل اۋزىندا «پانفيلوۆشىلار» دەپ اتالىپ كەتكەن 316-شى اتقىشتار ديۆيزياسى قۇرىلدى. بۇگىنگى كۇن – تاريحي كۇن. قورعانىس مينيسترلىگىنە جانە بيۋست جاساۋعا اتسالىسقان بارشاعا ازاماتتارعا العىس ايتامىن»، – دەپ باتىردىڭ نەمەرەسى الۋا بايقاداموۆا شارانى ۇيىمداستىرۋشىلارعا ريزاشىلىعىن ءبىلدىردى.
سالتاناتتى راسىمگە قاتىسۋشىلار يۆان پانفيلوۆتىڭ بيۋستىنە گۇل شوقتارىن قويىپ، وسىلايشا وتان تاريحىندا جارقىن ءىز قالدىرعان باتىردىڭ رۋحىنا تاعزىم ەتتى.