قۇجاتى راسىمدەلمەگەن جەرگە ءۇي تۇرعىزىلعان نەمەسە كاسىپكەرلىك نىسان سالىنعان
تالدىقورعاندا بەس جارىم مىڭنان اسا جەر ۋچاسكەسىن بىرەۋلەر زاڭسىز يەمدەنىپ العان. ولاردىڭ ءبىر دە ءبىرىنىڭ قۇجاتى جوق، دەپ حابارلايدى Almaty-akshamy.kz قازاقپاراتقا سىلتەمە جاساپ.
ءقازىر جەر تەلىمدەرىن ءوز بەتىنشە يەمدەنگەندەردىڭ ءتىزىمى جاسالىپ، ولارعا ەسكەرتۋ حاتتاماسى بەرىلىپ جاتىر.
ەسكەرتۋدى ەلەمەي، جەردىڭ قۇجاتىن جاساماعان ءىرى كاسىپكەرلەرگە 2 ملن تەڭگەدەن اسا ايىپپۇل سالىنادى.
«ءۇش اي مەرزىمدە تالدىقورعان قالاسىنداعى حالىققا قىزمەت كورسەتۋ ورتالىعىنا جۇگىنۋ ارقىلى جەرلەرىن زاڭداستىرۋعا مۇمكىندىك بار. جەرلەرىن زاڭداستىرماسا، جەكە تۇلعاعا 75 اەك، ءىرى كاسىپكەرلەرگە 700 اەك كولەمىندە ايىپپۇل سالىنادى»، - دەدى «ازاماتتارعا ارنالعان ۇكىمەت» مك اق جەتىسۋ وبلىسى بويىنشا فيليالى ديرەكتورىنىڭ ورىنباسارى بەكزات تاستانبايەۆ.
ال بەس جارىم مىڭنان اسا جەردىڭ قۇجاتى جوق ەكەنىن ماماندار ارنايى اەروعارىش زەرتتەۋى ارقىلى انىقتاعان.
قاراپايىم مىسال رەتىندە ايتاتىن بولساق، قۇجاتى راسىمدەلمەگەن جەرگە ءۇي تۇرعىزىلعان نەمەسە كاسىپكەرلىك نىسان سالىنعان.
وسىلايشا ءبىر عانا تالدىقورعاننىڭ وزىندە 5568 جەر ۋچاسكەسىنىڭ قۇجاتى بولىپ شىققان.
ماماندار ەسكەرتۋ حاتتاماسىن العان جانداردىڭ حالىققا قىزمەت كورسەتۋ ورتالىعىنا كەلىپ، تەز ارادا قۇجاتتارىن راسىمدەۋ كەرەكتىگىن ەسكەرتەدى.
ەگەر قۇجاتتاردى راسىمدەمەسە، ايىپپۇل سالىنادى. سەبەبى، بۇل جەرلەردىڭ بارلىعى - مەملەكەت مەنشىگىندە تۇرعان جەر تەلىمدەرى.
ەڭ از دەگەن ايىپپۇلدىڭ كولەمى جەكە تۇلعاعا 230 مىڭ تەڭگە، جەكە كاسىپكەرگە 306 مىڭ، ال ورتاشا كاسىپ يەسى 500 مىڭ تەڭگەگە دەيىن ايىپپۇل ارقالايدى.
«ءارتۇرلى جاعداي بولۋى مۇمكىن. مىسالى، ول جەر كەزىندە بۇل كىسىلەرگە بەس جىل ۋاقىتقا ۋاقىتشا مەرزىمگە بەرىلگەن بولۋى مۇمكىن. ۋاقىتتىڭ مەرزىمى وتكەننەن كەيىن سول جەردى پايدالانىپ وتىرعان ادامدار جەر قاتىناستارى بولىمىنە جۇگىنە وتىرىپ، قايتادان ۇزارتۋعا قۇقىقتارى بار»،- دەدى جەتىسۋ وبلىسىنداعى جەر رەسۋرستارىن باسقارۋ دەپارتامەنتى باسشىسىنىڭ ورىنباسارى ەركەبۇلان مادىبايەۆ.