تالاپكەرلەر ناۋرىز ۇبت-سىن تاپسىردى

ەكى اپتادا سىناقتان وتكەن تالاپكەردىڭ سانى – 59 مىڭ.

جاستاردىڭ 71،49%-ى قازاق تىلىندە تەستىلەۋدەن ءوتتى، دەپ حابارلايدى Almaty-akshamy.kz عىلىم جانە جوعارى ءبىلىم مينيسترلىگىنە سىلتەمە جاساپ.

ناۋرىز ايىنداعى ۇبت باستالعاننان بەرى 59 مىڭنان استام ادام تەست تاپسىردى. ونىڭ ىشىندە تالاپكەرلەردىڭ 71،49%-ى قازاق تىلىندە، 29،39%-ى ورىس تىلىندە، 70 ادام اعىلشىن تىلىندە تەستىلەۋدەن ءوتتى.

ۇبت باستالعالى شەكتى بالدى 69،26%-عا جۋىق تالاپكەر جينادى. ورتاشا بالعا كەلەتىن بولساق، ول 65،08 بالل بولدى. ەڭ جوعارى بالل – 137.

تەستكە قاتىسۋشىلاردىڭ باسىم بولىگى «ماتەماتيكا-فيزيكا» 17،38% جانە «بيولوگيا-حيميا» كومبيناسياسىن 15،91%-دان تاپسىردى. سونداي-اق توپ-3 قاتارىنا تالاپكەرلەردىڭ 11،75%-ى تاڭداعان «ماتەماتيكا-ينفورماتيكا» كومبيناسياسى كىردى. ەڭ از تاڭدالعان كومبيناسيا – «حيميا-فيزيكا»، ونى 76 ادام تاپسىرعان.

بۇگىندە 81 ەرەجە بۇزۋشىلىق انىقتالعان. ونىڭ ىشىندە 50 تالاپكەر سمارتفون، شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 31 ادام شىعارىلىپ، ولاردىڭ ناتيجەلەرى جويىلدى. بوگدە تۇلعالار انىقتالعان جوق، – دەلىنگەن حابارلامادا.

ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ارقاسىندا ۇبت-عا ەكى اپتادا 148 تالاپكەر قاتىستى.

تالاپكەرلەر تەستىلەۋ اياقتالعاننان كەيىن 30 مينۋتتا اپەللياسياعا بەرە الادى. سەرتيفيكات اپەللياسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.

2024 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلادى.