جەلى قولدانۋشىلارىنىڭ ايتۋىنشا، تاكسي جۇرگىزۋشىسىنە اۋىر سوزدەر ايتقان — تالعار اۋداندىق قوعامدىق كەڭەستىڭ مۇشەسى.
الماتى وبلىسىنىڭ پوليسەيلەرى تاكسي جۇرگىزۋشىسىمەن دورەكى سويلەسىپ، ەسىگىن تارس جاۋىپ، كولىگىن تەۋىپ كەتكەن ەر ادامدى ىزدەپ جاتىر. وقيعانىڭ ۆيدەوسى الەۋمەتتىك جەلىلەردە تارادى،دەپ حابارلايدى Almaty-akshamy.kz
الماتى وبلىستىق پوليسيا دەپارتامەنتىنىڭ مالىمەتىنشە، قازىرگى ۋاقىتتا تاكسي جۇرگىزۋشىسىمەن جانجالداسقان ادامدى ىزدەستىرۋ جۇمىستارى جۇرگىزىلۋدە.
«قازىرگى ۋاقىتتا تالعار اۋداندىق پوليسيا ءبولىمىنىڭ قىزمەتكەرلەرى بۇل فاكتىنى حاتتامامەن تىركەدى. پروسەسسۋالدىق شەشىم قابىلداۋ ءۇشىن وقيعاعا قاتىسۋشىلاردىڭ تۇرعىلىقتى جەرىن انىقتاۋ بويىنشا ىزدەستىرۋ شارالارى جۇرگىزىلۋدە»، - دەپ حابارلادى الماتى وبلىسى ءىىد باسپا ءسوز قىزمەتى.
الماتى وبلىسىنىڭ اكىمدىگى ونىڭ تالعار اۋداندىق قوعامدىق كەڭەسىنىڭ مۇشەسى ەكەنىن راستادى.
«الەۋمەتتىك جەلىلەردە تالعار قالاسىندا تاكسي جۇرگىزۋشىسى مەن جولاۋشى اراسىنداعى جانجال تۇسىرىلگەن ۆيدەو تارالۋدا. كەيبىر اقپارات كوزدەرى جولاۋشى گۇلدالا اۋىلىنداعى مەشىتتىڭ يمامى ەكەنىن ايتادى. الايدا الماتى وبلىسىنىڭ ءدىن ىستەرى باسقارماسى ونىڭ يمام ەمەس ەكەنىن مالىمدەدى. اتالعان ەر ادام تالعار اۋداندىق قوعامدىق كەڭەسىنىڭ مۇشەسى ەكەنىن حابارلايمىز. جالعان اقپارات تاراتپاۋىڭىزدى سۇرايمىز»، – دەپ حابارلادى اۋدان اكىمدىگى.