الماتى قالاسىنداعى قازاقستان رەسپۋبليكاسىنىڭ ۇلتتىق كىتاپحاناسىندا مەملەكەت جانە قوعام قايراتكەرى، تەحنيكا عىلىمدارىنىڭ دوكتورى، پروفەسسور، ق ر ۇلتتىق ينجەنەرلىك اكادەمياسىنىڭ پرەزيدەنتى، اكادەميك باقىتجان تۇرسىن ۇلى جۇماعۇلوۆتىڭ «تايتالاس تاعدىر» اتتى كىتابىنىڭ تۇساۋكەسەر ءراسىمى ءوتتى. ءىس-شارانى ۇلتتىق ينجەنەرلىك اكادەمياسى ۇيىمداستىرىپ، وعان عىلىمي قاۋىمداستىق وكىلدەرى، زيالى قاۋىم، مەملەكەتتىك ورگاندار مەن جوعارى وقۋ ورىندارىنىڭ باسشىلارى قاتىستى.
تۇساۋكەسەردى قازاقستان رەسپۋبليكاسىنىڭ مەملەكەتتىك سىيلىعىنىڭ لاۋرەاتى، اقىن نۇرلان ورازالين جۇرگىزىپ، ەڭبەكتىڭ مازمۇندىق تەرەڭدىگى مەن قوعام ءۇشىن وزەكتىلىگىن اتاپ ءوتتى. ق ر پارلامەنتى سەناتىنىڭ ءتوراعاسى ماۋلەن اشىمبايەۆتىڭ قۇتتىقتاۋىن سەنات دەپۋتاتى نۇرتورە ءجۇسىپ وقىپ بەردى. ق ر عىلىم جانە جوعارى ءبىلىم ءمينيسترى ساياسات نۇربەكتىڭ قۇتتىقتاۋىن ۆيسە-مينيستر تالعات ەشەنقۇلوۆ جەتكىزدى. سونداي-اق ۇلتتىق عىلىم اكادەمياسىنىڭ پرەزيدەنتى، اكادەميك اقىلبەك كۇرىشبايەۆ عىلىمي قاۋىمداستىق اتىنان جىلى لەبىزىن ءبىلدىردى.
«تايتالاس تاعدىر» كىتابىندا اۆتور تاۋەلسىز قازاقستاننىڭ قالىپتاسۋ كەزەڭدەرىندە ورىن العان ماڭىزدى شەشىمدەر مەن تاريحي وقيعالاردى ءوز كوزقاراسى مەن ومىرلىك تاجىريبەسى ارقىلى باياندايدى. مەملەكەتتىك باسقارۋداعى قيىن دا جاۋاپتى كەزەڭدەر، ەل دامۋىنا ىقپال ەتكەن رەفورمالار، قوعامنىڭ وزگەرۋ باعىتتارى كىتاپتىڭ نەگىزگى ارقاۋىنا اينالعان. سونىمەن قاتار، اۆتور ءار جىلدارى بىرگە قىزمەت ەتكەن كورنەكتى تۇلعالار تۋرالى ەستەلىكتەرىمەن ءبولىسىپ، ولاردىڭ ەلدىك مۇددە جولىنداعى ەڭبەگىنە توقتالادى. ەڭبەكتە قازاق عىلىمىنىڭ، ينجەنەرلىك ويدىڭ، ءبىلىم بەرۋ سالاسىنىڭ بولاشاعى مەن ۇلتتىق قۇندىلىقتاردى دامىتۋ ماسەلەلەرى جان-جاقتى تالدانادى.
ءىس-شارا بارىسىندا ءسوز العان قاتىسۋشىلار بۇل كىتاپتىڭ جاس ۇرپاققا، مەملەكەتتىك قىزمەتكەرلەرگە، زەرتتەۋشىلەرگە جانە ينجەنەرلىك-تەحنيكالىق سالا ماماندارىنا ۇلكەن رۋحاني جانە زياتكەرلىك ازىق بولاتىنىن اتاپ ءوتتى. تۋىندى ەل تاريحىنىڭ ماڭىزدى كەزەڭدەرىن ءوز كوزىمەن كورگەن ءارى سول ۇدەرىستەردىڭ بەل ورتاسىندا جۇرگەن تۇلعانىڭ تەرەڭ وي تولعامدارىن قامتيتىن قۇندى ەڭبەك رەتىندە باعالاندى. كىتاپتا ۇسىنىلعان تالداۋلار مەن پايىمدار قازىرگى قازاقستاننىڭ دامۋ بارىسىن جاڭا قىرىنان تۇسىنۋگە مۇمكىندىك بەرەتىنى ايتىلدى.
قازاقستان رەسپۋبليكاسى ۇلتتىق ينجەنەرلىك اكادەمياسى «تايتالاس تاعدىر» كىتابىنىڭ جارىق كورۋىن ۇلتتىق عىلىمي جانە ينجەنەرلىك قاۋىمداستىق ءۇشىن ماڭىزدى وقيعا دەپ ەسەپتەيدى. بۇل ەڭبەك ەلىمىزدىڭ زياتكەرلىك مۇراسىنىڭ ءبىر بولىگى رەتىندە عىلىمي ورتانىڭ دا، قوعامنىڭ دا نازارىندا بولادى دەپ سەنىم بىلدىرەدى. اكادەميا تۇساۋكەسەرگە قاتىسقان بارلىق قوناقتارعا العىس بىلدىرە وتىرىپ، كىتاپتىڭ كەڭ تارالىپ، جاس بۋىنعا باعىت-باعدار بولاتىن قۇندى دۇنيە رەتىندە قىزمەت ەتەتىنىنە سەنىم ارتادى.