تايلاندتا كوز جۇمعان ەكى قازاقستاندىقتىڭ دەنەسى ەلگە جەتكىزىلەدى

ارتۋر ىسقاقوۆتىڭ تايلاندتا قايتىس بولعانىن بۇدان بۇرىن حابارلاعانبىز.

تاعى ءبىر قازاقستاندىق 45 جاستاعى الەكساندر ماكاروۆ تايلاندتا تەڭىزگە ءتۇسىپ، قايتا شىعا الماعان، دەپ حابارلايدى Almaty-akshamy.kz

ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆتىڭ مالىمدەۋىنشە، ەكى قازاقستاندىقتىڭ دەنەسى جاقىن ارادا ەلگە جەتكىزىلەدى.

1 ماۋسىمدا ارتۋر ىسقاقوۆ شەكتەۋ شارالارىنا قاراماي، جاعاجايدا سۋعا تۇسكەن.

بەيرەسمي اقپاراتقا سايكەس، ول سۋعا باتىپ بارا جاتقان قىزىن قۇتقارۋعا تىرىسقان. ءبىراق ءوزى قاتتى تولقىنعا توتەپ بەرە الماي، سۋعا باتىپ كەتە جازدادى. ونى شۇعىل اۋرۋحاناعا جەتكىزىپ، جانساقتاۋ بولىمىنە جاتقىزدى. كەشە كەشكىسىن ارتۋردىڭ جۇرەگى توقتاپ قالدى.

"بۇل سوڭعى ءبىر اپتادا بولعان ەكىنشى جاعداي، 3 ماۋسىمدا تۋرا سول جەردە تاعى ءبىر قازاقستاندىق قايتىس بولدى. ول دا شەكتەۋلەرگە قاراماي، سۋعا تۇسكەن. ونى دا قاتتى تولقىن الىپ كەتتى. قازىرگى كەزدە كونسۋل تۋىستارىنا قاجەتتى قۇجاتتاردى راسىمدەۋگە كومەكتەسىپ جاتىر. جاقىن ارادا ەكەۋىنىڭ دەنەسى قازاقستانعا جەتكىزىلەدى"، - دەدى سمادياروۆ بۇگىنگى بريفينگتە.

ارتۋردىڭ اتا-اناسى پحۋكەتكە ۇشىپ باردى.

3 ماۋسىمدا تاعى ءبىر قازاقستاندىق تايلاندتا تەڭىزگە ءتۇسىپ، قايتا شىعا الماعان. 45 جاستاعى الەكساندر ماكاروۆ سۋعا تۇنشىعىپ قالعانى بەلگىلى بولدى. قۇتقارۋشىلار مەن تۋريستەر ونى تالانگ اۋرۋحاناسىنا جەتكىزگەن، الايدا ەر ادامدى امان الىپ قالا الماعان.

تايلاند پوليسياسىنىڭ مالىمەتىنە سايكەس، كوبىنەسە، تمد-دان كەلەتىن تۋريستەر شەكتەۋ شارالارىن ەلەمەي سۋعا تۇسەدى. سونىڭ سالدارىنان قايعىلى جاعداي ازايماي وتىر.