92-مينۋتتا زاكاريا ابۋحليال گول سوعىپ، قورىتىندى ەسەپتى بەلگىلەدى
قاتاردا ءوتىپ جاتقان فۋتبولدان 2022 جىلعى الەم چەمپيوناتىنىڭ F توبىندا سەنساسيا تىركەلىپ، ماروككو قۇراماسى بەلگيادان باسىم ءتۇستى، دەپ حابارلايدى Almaty-akshamy.kz قازاقپاراتقا سىلتەمە جاساپ.
الەمنىڭ الدىڭعى قاتارلى قۇراماسىنىڭ ءبىرى سانالاتىن بەلگيا دوپ دوداسىندا ازىرگە ادەمى ويىن ورنەگىمەن كوزگە تۇسە الماي كەلەدى. العاشقى تۋردا كانادانى 1:0 ەسەبىمەن جەڭگەن ولار ەكىنشى تۋردا جانكۇيەرلەردى جىگەرلى قيمىلمەن جەلپىندىرەمىز دەگەن نيەت تانىتقان ەدى.
ءبىرىنشى ويىنىندا حورۆاتيامەن 0:0 ەسەبىمەن تەڭ تۇسكەن ماروككولىق فۋتبولشىلار ازۋلى قارسىلاسىنا تەگەۋرىندى قارسىلىق كورسەتتى. ويىننىڭ ءبىرىنشى كەزەڭىندە ويىن الما-كەزەك شابۋىلمەن ءوربىپ جاتتى. كەز كەلگەن ساتتە تابلوداعى ەسەپكە وزگەرىس ەنۋى مۇمكىن بولاتىن. ءتىپتى، 45+3 مينۋتتا حاكيم زيەش تەپكەن دوپ قاقپا تورىندا تۋلاپ جاتتى. تورەشىلەر ماروككولىق فۋتبولشىلار ويىننان تىس قالدى دەگەن سەبەپپەن ونى جاراتپاي تاستادى.
ەكىنشى كەزەڭدە بەلگيالىق فۋتبولشىلار بەلسەندى قيمىلىمەن كوزگە ءتۇستى. دەگەنمەن، دىتتەگەن ماقساتىنا جەتە الماي جاتتى. ولاردىڭ قاتارىنان ەدەن ازار تەپكەن دوپتى ماروككولىق قاقپاشى مۋنير سىرتقا شىعارىپ ۇلگەردى.
ودان كەيىنگى ۋاقىتتا افريكا قۇرلىعىنىڭ وكىلدەرى دە قارسى شابۋىلعا شىقتى. وسىنداي ساتتەردىڭ بىرىندە ايىپ دوبىن ورىنداعان ابدەلحاميد سابيري بەلگيالىق قاقپاشىنىڭ وسال تۇسىن تاۋىپ كەتتى. ال، 92-مينۋتتا زاكاريا ابۋحليال گول سوعىپ، قورىتىندى ەسەپتى بەلگىلەدى.
وسىلايشا، الەم چەمپيوناتىندا تاعى ءبىر مارتە سەنساسيا تىركەلدى. ماروككو قۇراماسى بەلگيادان 2:0 ەسەبىمەن باسىم ءتۇستى.