«اقمەشىت» گۋمانيتارلىق-تەحنيكالىق ينستيتۋتى باس ليسەنزياسىنان ايىرىلدى.
ق ر بعم ءبىلىم جانە عىلىم سالاسىندا ساپانى قامتاماسىز ەتۋ كوميتەتى جۇرگىزگەن قايتا تەكسەرۋدىڭ ناتيجەلەرى وسىنداي بولدى، دەپ حابارلايدى Almaty-akshamy.kz مينيسترلىكتىڭ باسپا ءسوز قىزمەتىنە سىلتەمە جاساپ.
قىزىلوردا قالاسىنداعى «اقمەشىت» ينستيتۋتىنا ۇيعارىم بەرىلىپ، وقۋ ورنىنا بارلىق سايكەسسىزدىكتى جويۋعا ۋاقىت بەرىلدى. الايدا، جوعارى وقۋ ورنى بەرىلگەن ۋاقىتتى ءبىلىم بەرۋ قىزمەتتەرىنىڭ ساپاسىن جاقسارتۋ ءۇشىن قاجەتتى جۇمىستى جۇرگىزۋگە ەمەس، سوت تالقىلاۋىنا جانە ق ر بعم كوميتەتىنىڭ ىس-ارەكەتتەرىنە شاعىمدانۋعا جۇمسادى.
«جوعارى وقۋ ورىندارىندا تەكسەرۋ جۇمىستارىن ءبىلىم بەرۋ ساپاسى مەن كادرلار دايارلاۋدى جاقسارتۋ ءۇشىن جۇرگىزەتىنىمىزدى ءتۇسىنۋ ماڭىزدى. بۇل رەتتە ءبىز جوو-لاردى ليسەنزيادان بىردەن ايىرمايمىز جانە ولاردى بىردەن جاپپايمىز. جوعارى وقۋ ورىندارىنا بۇزۋشىلىقتاردى جويۋعا ۋاقىت بەرىلگەنىمەن، ەشقانداي ارەكەت بولعان جوق. وسىعان بايلانىستى ءبىز كەيىنىرەك قاتاڭ شارالار قابىلداۋعا ءماجبۇرمىز. جوعارى وقۋ ورىندارىنىڭ ستۋدەنتتەرى ءۇشىن جاعداي جاساپ، ءبىلىم بەرۋ باعدارلامالارىنىڭ ساپاسىن جاقسارتۋعا قول جەتكىزۋى ماڭىزدى. ايتپەسە، جوسىقسىز ۋنيۆەرسيتەتتەر ساپالى بىلىممەن قامتاماسىز ەتپەي، ديپلوم بەرۋدى جالعاستىراتىن بولادى. «اقمەشىت» گۋمانيتارلىق-تەحنيكالىق ينستيتۋتىنا كەلەتىن بولساق، سوڭعى تەكسەرۋ وسى جىلدىڭ ماۋسىم ايىندا جۇرگىزىلدى. بۇزۋشىلىقتار جويىلعان جوق. اڭگىمە ماتەريالدىق-تەحنيكالىق بازانىڭ السىزدىگى جانە وقۋ پروسەسىن ۇيىمداستىرۋداعى ەلەۋلى كەمشىلىكتەر تۋرالى بولىپ وتىر. ۋنيۆەرسيتەتتەگى كەيبىر پاندەردى ءتيىستى ءبىلىمى مەن دارەجەسى جوق وقىتۋشىلار جۇرگىزگەن. ءتىپتى وقۋ پروسەسىن مەرزىمىنەن بۇرىن اياقتاپ، ناتيجەسىندە ستۋدەنتتەر ءبىلىم بەرۋ باعدارلامالارىن تولىق يگەرە الماعان. قازىرگى تاڭدا ينستيتۋت وقۋ ورنىن ليسەنزيادان ايىرۋ تۋرالى قابىلداعان شەشىمىمىزگە نارازىلىق بىلدىرۋگە تىرىسىپ جاتىر»، – دەدى ق ر بعم ءبىلىم جانە عىلىم سالاسىندا ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.
وسى جىلدىڭ تۇلەكتەرى باسقا جوعارى وقۋ ورىندارىنا اۋىسا الادى جانە ولاردىڭ وقۋ ناتيجەلەرى ەسكەرىلىپ، ديپلوم بەرىلەدى.