سىرداريا وزەنىندە زاڭسىز سۋ تارتۋ ءۇشىن ورناتىلعان بىرنەشە ناسوس قوندىرعىلارى انىقتالدى، دەپ حابارلايدى Aqshamnews.kz ق ر سۋ رەسۋرستارى جانە يرريگاسيا مينيسترلىگىنىڭ باسپا ءسوز قىزمەتىنە سىلتەمە جاساپ.
«ارال-سىرداريا باسسەيندىك ينسپەكسياسىنىڭ ماماندارى سىرداريا وزەنىنەن زاڭسىز سۋ العان توعىز تىركەلمەگەن ناسوس قوندىرعىسىن انىقتادى. اتالعان فاكتىلەر بويىنشا توعىز اكىمشىلىك ءىس قوزعالىپ، قۇقىق بۇزۋشىلارعا جالپى سوماسى شامامەن 1،7 ميلليون تەڭگە كولەمىندە ايىپپۇل سالىندى. جالپى، جىل باسىنان بەرى ارنايى سۋ پايدالانۋعا رۇقساتى جوق 62 تۇلعا انىقتالىپ، ولارعا 12،7 ميلليون تەڭگەدەن استام ايىپپۇل سالىندى»، – دەلىنگەن جەكسەنبى كۇنى تاراتىلعان حابارلامادا.
بۇدان بولەك، جاڭا سۋ كودەكسىنىڭ كۇشىنە ەنۋىنە بايلانىستى ينسپەكسيا ماماندارى 73 ەلدى مەكەندە ءتۇسىندىرۋ جۇمىستارىن جۇرگىزگەن.
«سونداي-اق، ءبىر زاڭ بۇزۋشىلىق فاكتىسى توبىل-تورعاي باسسەيندىك ينسپەكسياسى تاراپىنان انىقتالدى. اتاپ ايتقاندا، نەگىزگى سۋ قۇبىرىندا اقاۋ جانە سۋ ەسەپتەگىش قۇرالدىڭ ىستەن شىققانى بەلگىلى بولدى»، – دەپ تولىقتىردى مينيسترلىك.
ناتيجەسىندە سۋ پايدالانۋشىعا ايىپپۇل سالىنىپ، انىقتالعان كەمشىلىكتەردى جويۋ تۋرالى نۇسقاما بەرىلدى.
«قازىرگى ۋاقىتتا بارلىق باسسەيندىك ينسپەكسيالار سۋ زاڭناماسىن بۇزۋ دەرەكتەرىن انىقتاۋ ماقساتىندا تۇراقتى تۇردە مونيتورينگ جۇرگىزىپ جاتىر. سونىمەن قاتار، سۋ پايدالانۋشىلارعا جاڭا سۋ كودەكسى، سۋارمالى سۋدى پايدالانۋ ەرەجەلەرى، ارنايى سۋ پايدالانۋعا رۇقسات راسىمدەۋ جانە سۋ ۇنەمدەۋ تەحنولوگيالارىنا كوشۋ قاجەتتىگى بويىنشا ءتۇسىندىرۋ جۇمىستارى دا جۇرگىزىلۋدە»، – دەدى ق ر سۋ رەسۋرستارىن رەتتەۋ، قورعاۋ جانە پايدالانۋ كوميتەتى ءتوراعاسىنىڭ ورىنباسارى تەمىرلان ءابدىقۇلوۆ.