2023 جىلدىڭ قاڭتار-جەلتوقسان ايلارىندا قازاقستاندىق سىرا قايناتۋشىلار 611،2 ميلليون ليتر سىرا وندىرگەن. سايكەسىنشە، 2022 جىلمەن سالىستىرعاندا 14،8%-عا از. 2021 جىلى سىرا ءوندىرىسى 15،4%-عا قىسقارىپ، رەكورد ورناعان بولاتىن.
بيىلعى قاڭتاردا 29 ميلليون ليتر سىرا وندىرىلگەن. بۇل 2023 جىلدىڭ قاڭتارىمەن سالىستىرعاندا 34،8 پايىزعا از، دەپ حابارلايدى اlmaty-akshamy.kz.
2023 جىلعى قاڭتار-جەلتوقساندا قازاقستاندىق سىرا قايناتۋ زاۋىتتارى سىراعا سۇرانىستىڭ 89،8%-ىن، 2022 جىلى 92،4%-ىن قامتاماسىز ەتكەن. قازاقستان رەسپۋبليكاسىنا يمپورتتالعان سىرانىڭ كولەمى بىردەن 17،3%-عا، 69،6 ملن ليترگە دەيىن وسكەن. وسىلايشا، يمپورت ۇلەسىن 7،6%-دان 10،2%-عا دەيىن ۇلعايتتى.
سىرا ەكسپورتى 20،2 ملن ءليتردى قۇراپ، 2،8%-عا قىسقارعان. ال ىشكى نارىقتاعى ساتىلىم 12،6%-عا، ياعني 660،5 ملن ليترگە دەيىن تومەندەگەن.
ال، رەسپۋبليكالىق پسيحيكالىق دەنساۋلىق عىلىمي-تاجىريبەلىك ورتالىعىنىڭ مالىمەتىنشە، سولتۇستىك قازاقستان، اباي، پاۆلودار جانە شىعىس قازاقستان وبلىستارى سىرانى ەڭ كوپ ىشەتىن وڭىرلەر رەتىندە تىركەلسە، ەڭ از ىشەتىن وڭىرلەر رەتىندە – الماتى، ماڭعىستاۋ جانە الماتى وبلىستارى. بارلىعى 90،4 مىڭ قازاقستاندىق ىشىمدىك ماسەلەسىنە بايلانىستى ەسەپتە تۇر.
2024 جىلدىڭ قاڭتار ايىنىڭ سوڭىندا الكوگولدىك سىرانىڭ باعاسى 0،4%-عا وسكەن. وتكەن جىلدىڭ جەلتوقسان ايىندا بۇل سۋسىن 1،3%-عا، ال 2023 جىلدىڭ قاڭتارىندا 2،9%-عا قىمباتتاعان.
قازاقستان رەسپۋبليكاسىنىڭ وڭىرلەرى اراسىندا الكوگولدىك سىرا باعاسىنىڭ ەڭ جوعارى جىلدىق ءوسىمى اقمولا وبلىسىندا بايقالعان. ودان كەيىنگى ورىندا ۇلىتاۋ جانە ماڭعىستاۋ وبلىستارى بولسا، پاۆلودار، تۇركىستان جانە جامبىل وبلىستارىندا ەڭ ارزان باعا تىركەلگەن.