ورتالىق 1000 كورەرمەنگە ارنالعان.
«ونەر ورتالىعىنىڭ» سالتاناتتى اشىلۋىنا ق ر مادەنيەت جانە اقپارات ءمينيسترى ايدا بالايەۆا جانە كوميسسيا مۇشەلەرى، بەلگىلى قوعام قايراتكەرلەرى، وڭىرلەردەن كەلگەن دەلەگاسيالار، وبلىستىڭ زيالى قاۋىمى، ەڭبەك ارداگەرلەرى، قوعامدىق ۇيىمدار وكىلدەرى قاتىستى، دەپ حابارلايدى Almaty-akshamy.kz
1000 كەلۋشىگە ارنالعان ورتالىقتىڭ ىرگەتاسى 2022 جىلدىڭ قىركۇيەك ايىندا قالاندى. قۇنى 3،7 ملرد. تەڭگەنى قۇرايتىن ءزاۋلىم عيماراتتا سيمفونيالىق، ەسترادالىق جانە ۇلتتىق ونەر باعىتىنداعى كونسەرتتىك باعدارلامالار، ءتۇرلى فورماتتاعى قوعامدىق ءىس-شارالار وتكىزىلەدى.
وبلىس اكىمى نۇرلىبەك نالىبايەۆ قىزىلوردالىقتاردى جاڭا نىساننىڭ اشىلۋىمەن قۇتتىقتادى.
"مەملەكەت باسشىسى قاسىم-جومارت كەمەل ۇلى "ۇلت مادەنيەتى – حالىق ءومىرىنىڭ ايناسى. ەلىمىزدىڭ رۋحاني دامۋى ۇلتتىق رۋحقا تىكەلەي بايلانىستى. ازاماتتارىمىزدىڭ رۋحى ءارقاشان بيىك بولۋى ءۇشىن مادەنيەتىمىزگە، ياعني رۋحانياتىمىزعا باسا ءمان بەرگەنىمىز ءجون" دەگەن بولاتىن. سىر ءوڭىرى – شەجىرە تۇنعان، حالىقتىڭ اسىل مۇرالارى ساقتالعان التىن كومبەلى مەكەن، قازاق تەاترىنىڭ العاشقى قازىعى قاعىلعان جەر. ايماعىمىزدىڭ كيەلى ساحناسىنان مادەنيەت مايتالماندارى مەن ونەر تارلاندارى تۇلەدى. قىزىلوردادا وسىنداي ونەر ورداسىنا قاجەتتىلىك زامان ۇدەرىستەرى مەن كورەرمەن تالعامىنا سايكەس تۋىندادى. از عانا ۋاقىتتىڭ ىشىندە قۇرىش قولدى قۇرىلىسشىلارىمىزدىڭ كاسىبي شەبەرلىگى ارقاسىندا كوز الدارىڭىزدا ءسانى مەن ساۋلەتى كەلىسكەن "ونەر ورتالىعى" بوي كوتەردى. عيماراتتىڭ سالتاناتتى اشىلۋىن ايەل-انالارىمىزدىڭ قۇرمەتىنە، سىر سۇلۋلارىنىڭ مەرەكەسىنە ارناۋدامىز. "ونەر ورتالىعى" ەلىمىزدىڭ رۋحاني قازىناسىن تولتىرۋعا، مادەنيەتى مەن ونەرىن اسقاقتاتۋعا قىزمەت ەتە بەرسىن!"، – دەدى ايماق باسشىسى.