الماتىدا ۇستاز Covid-19 جۇقتىرسا، وقۋشىلارعا ساباقتى جوو ستۋدەنتتەرى وتكىزۋگە دايىن.
ءبىلىم باسقارماسىنىڭ باسشىسى ءلاززات جىلقىبايەۆا باستاۋىش سىنىپتاردا مىندەتتى تۇردە 2-3 رەزەرۆتەگى ءمۇعالىم بولاتىنىن ايتتى، دەپ حابارلايدى Almaty-akshamy.kz 31-ارنانىڭ ينفورمبيۋرو اقپاراتتىق باعدارلاماسىنا سىلتەمە جاساپ.
الماتى مەكتەپتەرىندە ۇستازدار Covid-19 جۇقتىرسا، وقۋشىلارعا ساباقتى رەزەرۆتە تۇرعان ءمۇعالىم نەمەسە تاجىريبە جيناقتاۋشىلار وتكىزەدى. ال اتا-انالارعا بالاسىنا كۇندەلىكتى 4-5 بەتپەردە جانە انتيسەپتيك الىپ بەرۋ مىندەتى جۇكتەلىپ وتىر. ەگەر وتباسىنىڭ مۇنداي مۇمكىندىگى بولماسا، بەتپەردەنى مەكتەپ بەرەدى. وقۋشىلار مەكتەپ عيماراتىنا بىرنەشە ەسىكتەن كىرگىزىلىپ، كىرەبەرىستە ولاردىڭ دەنە قىزۋىن مەدبيكە ولشەيدى. مۇنىڭ الدىندا تولىق دەزينفەكسيالانادى. 1،5 مەتردەن كەم ەمەس ارا قاشىقتىق ساقتالۋى ءۇشىن دالىزدەن سىنىپقا جەتكەنشە ارنايى قىزىل جولاقتار سىزىلعان. مۇنىمەن قاتار، ءار 2-3 ساعات سايىن سىنىپتى جەلدەتۋ، كۆارس قوسۋ سەكىلدى تازالىق تالاپتارى جۇرگىزىلەدى. سىنىپ ىشىندە سانيتايزەر، اۋىز سۋ، بەتپەردە مىندەتتى تۇردە بولادى.
ەگەر ءبىر سىنىپتاعى وقۋشىلار سانى 35-تەن اسىپ كەتسە، وندا ءدارىس ۇلكەنىرەك اۋديتوريادا وتكىزىلەدى. مەكتەپ ىشىندە ءمۇعالىم دە، وقۋشى دا بەتپەردەمەن جۇرەدى.
«الماتىدا ەكى پەداگوگيكالىق وقۋ ورنى ورنالاسقان. جوعارى كۋرس ستۋدەنتتەرى تاجىريبەسىن مەكتەپتە ءوتۋى ءۇشىن ۋنيۆەرسيتەتتەرمەن تىكەلەي دۋالدى وقىتۋ جۇيەسى بويىنشا بايلانىستامىز. جالپى، كەز كەلگەن مەكتەپتىڭ باستاۋىش بلوگىندا كەم دەگەندە رەزەرۆتە 2-3 وقىتۋشى بولادى»، – دەدى الماتى قالاسى ءبىلىم باسقارماسىنىڭ باسشىسى ءلاززات جىلقىبايەۆا.
ەگەر ءبىر وقۋشى Covid-19 جۇقتىرسا، وندا سىنىپ تۇگەلدەي ونلاين وقۋعا كوشەدى. ءدال سول سەكىلدى انا-اناسى نە ءبىر ءۇيدىڭ بالالارى ۆيرۋستى جۇقتىرىپ السا، قالعاندارى دا قاشىقتان ءبىلىم الادى. «اشىق» قوسىمشاسى تەك مەكتەپتىڭ اۋماعىنا كىرگىسى كەلەتىن انا-انالارعا قاجەت. ءبىراق، اكە-شەشەسى ەكپە الماعان وقۋشىلار ءبىلىم وشاعىنا كىرگىزىلمەيدى دەگەن شەكتەۋ جوق.
ەسكە سالساق، الماتىدا سوڭعى ەكى اپتا ىشىندە مەكتەپ جاسىنداعى 1 778 بالادان Covid-19 انىقتالدى. ونىڭ 40-ى ءدال ءقازىر اۋرۋحانادا ەم الىپ جاتىر.