الماتىدا سىبايلاس جەمقورلىققا قارسى ءىس-قيمىل ماسەلەلەرى جونىندەگى قالالىق كوميسسيانىڭ وتىرىسى ءوتتى، دەپ حابارلايدى Almaty-akshamy.kz
مەگاپوليس باسشىسى ەربولات دوسايەۆ ق ر سىبايلاس جەمقورلىققا قارسى ءىس-قيمىل اگەنتتىگىنىڭ الماتى بويىنشا دەپارتامەنتىنىڭ باسشىسى ارمان راحيموۆپەن بىرلەسىپ، اۋدان اكىمدەرىنىڭ، اكىمدىك باسقارمالارى مەن قۇقىق قورعاۋ ورگاندارى باسشىلارىنىڭ قاتىسۋىمەن سىبايلاس جەمقورلىققا قارسى ءىس-قيمىل ماسەلەلەرى جونىندەگى قالالىق كوميسسيانىڭ وتىرىسىن وتكىزدى.
وتىرىستا مەملەكەت باسشىسى قاسىم-جومارت توقايەۆتىڭ سىبايلاس جەمقورلىقتىڭ العىشارتتارىن جويۋ جونىندەگى تاپسىرمالارىن ورىنداۋ اياسىندا سىبايلاس جەمقورلىق تاۋەكەلدەرى كارتاسىن ىسكە اسىرۋ بارىسى قارالدى. الماتىنىڭ تاۋ بوكتەرىندەگى قۇرىلىس سالاسىنداعى سىبايلاس جەمقورلىققا قاتىستى قۇقىق بۇزۋشىلىقتارعا ىقپال ەتەتىن، سونداي-اق 2019-2020 جىلدارى باستالعان قالانىڭ پروبلەمالىق وبەكتىلەرىنىڭ قۇرىلىسىن اياقتاۋعا كەدەرگى كەلتىرەتىن سەبەپتەردى جويۋعا ەرەكشە نازار اۋدارىلدى.
2023 جىلدىڭ ءساۋىر-مامىر ايلارى ارالىعىندا سىبايلاس جەمقورلىققا قارسى اگەنتتىك الماتى قالاسىنىڭ اكىمدىگىمەن بىرلەسىپ قۇرىلىس سالاسىنداعى سىبايلاس جەمقورلىق تاۋەكەلدەرىنە ىشكى تالداۋ جۇرگىزدى. سىبايلاس جەمقورلىق قۇقىق بۇزۋشىلىقتار جاساۋعا ىقپال ەتەتىن سەبەپتەر مەن جاعدايلاردى جويۋ جونىندەگى ءىس-شارالار جوسپارى قابىلداندى، 50 تارماقتان تۇرادى، ونىڭ 29-ى الماتى اكىمدىگىنە بەكىتىلگەن.
جوعارىدا اتالعان تارماقتاردى ىسكە اسىرۋ تۋرالى الماتى قالاسىنىڭ قالالىق جوسپارلاۋ جانە ساۋلەت، جەر قاتىناستارى، قۇرىلىس، ەنەرگەتيكا جانە سۋمەن جابدىقتاۋ باسقارمالارىنىڭ باسشىلارى باياندادى.
الماتىنىڭ جەر ءبولۋ جانە قالا قۇرىلىسىن دامىتۋدى جوسپارلاۋداعى بۇزۋشىلىقتاردى بولدىرماۋ ءۇشىن اكىمدىك قالانىڭ سيفرلىق كارتاسىندا ەرەكشە قورعالاتىن تابيعي اۋماقتاردىڭ كوورديناتتارىن بەلگىلەۋ بويىنشا جۇمىستاردى باستادى، جەردىڭ كاداسترلىق قۇنىن تولەۋ بويىنشا سيفرلىق قۇرالدار ەنگىزىلۋدە جانە ت. ب.
بۇگىندە الماتىدا تاۋ بوكتەرىندەگى ايماقتا قۇرىلىستى رەتتەۋدى قاتاڭداتۋ بويىنشا اۋقىمدى جۇمىس جۇرگىزىلۋدە جانە مەردىگەرلەردىڭ العان مىندەتتەمەلەرىن جوسىقسىز ورىنداۋى سەبەبىنەن سوزىلىپ جاتقان بۇرىن باستالعان پروبلەمالىق وبەكتىلەردىڭ قۇرىلىسىن اياقتاۋ ءۇشىن قاجەتتى شارالار قابىلدانۋدا.
ءوز كەزەگىندە ق ر سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتىنىڭ باسشىسى ارمان راحيموۆ ءوز بايانداماسىندا ورتالىق مەملەكەتتىك ورگاندار تاۋ بوكتەرىندەگى ايماقتا قۇرىلىس جۇرگىزۋ سالاسىنداعى زاڭنامانى جەتىلدىرۋ بويىنشا بەلگىلى ءبىر جۇمىستار اتقارعانىن حابارلادى. ماسەلەن، ق ر پارلامەنتى ماجىلىسىنە قالا قۇرىلىسىن باقىلاۋ ورگاندارىنىڭ جاۋاپكەرشىلىگىن كۇشەيتۋگە مۇمكىندىك بەرەتىن تۇزەتۋلەردى قاراستىراتىن زاڭ جوباسى ەنگىزىلدى.
سونداي-اق، قۇرىلىس پەن جۇمىس ساپاسىن باقىلاۋدىڭ جاڭا تەتىكتەرىن ەنگىزۋ بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى پارلامەنتتىڭ قاراۋىندا.
وتىرىستى قورىتىندىلاي كەلە، الماتى اكىمى ەربولات دوسايەۆ اكىمدىكتىڭ جاۋاپتى بولىمشەلەرىنە ءىس-شارالار جوسپارىنىڭ بارلىق تارماقتارى بويىنشا جوسپارلانعان ءىس-شارالاردىڭ ورىندالۋىن قامتاماسىز ەتۋدى جانە 2023 جىلعى 15 جەلتوقسانعا دەيىن الدىن الا ەسەپتەر دايىنداۋدى تاپسىردى. سونداي-اق، سىبايلاس جەمقورلىق تاۋەكەلدەرىن انىقتاۋعا، جويۋعا، قالا قۇرىلىسى، جەر قاتىناستارى جانە قالا قۇرىلىسىن باقىلاۋ سالالارىندا سىبايلاس جەمقورلىققا قارسى مادەنيەتتى نىعايتۋعا باعىتتالعان جۇمىستى كۇشەيتۋدى تاپسىردى.