قايراتكەرگە ارنالعان ءمۇسىن قوجانوۆ پەن جاروكوۆ كوشەلەرىنىڭ قيىلىسىنا قويىلعان.
الماتىدا تاۋەلسىزدىكتىڭ 30 جىلدىعى قارساڭىندا عالىم، پۋبليسيست سۇلتانبەك قوجانوۆقا ورناتىلعان ءبيۋستتىڭ اشىلۋ ءراسىمى ءوتتى، دەپ حابارلايدى Almaty-akshamy.kz
سالتاناتتى شاراعا تاريحي تۇلعانىڭ تۋىستارى، زيالى قاۋىم وكىلدەرى قاتىستى.
«ول قازاق ەلى تاۋەلسىزدىگىنىڭ باستاۋىندا تۇرعان تۇلعالاردىڭ ءبىرى. ول – ءاليحان بوكەيحاننىڭ، احمەت بايتۇرسىن ۇلىنىڭ، ءمىرجاقىپ دۋلات ۇلىنىڭ ءىزىن باسقان، سولارمەن تىعىز قارىم-قاتىناستا بولعان. الاش قايراتكەرلەرىمەن ارالاسقان، ءوز قايىرىمىن تيگىزگەن تانىمال تۇلعا»، – دەدى فيلولوگيا عىلىمدارىنىڭ دوكتورى امانتاي ءشارىپ.
مەملەكەت جانە قوعام قايراتكەرى، ۇستاز، عالىم، پۋبليسيست قوجانوۆ سۇلتانبەك 1894 جىلى وڭتۇستىك قازاقستان وبلىسى، سوزاق اۋدانى، اقسۇمبە اۋىلىندا تۋعان. ساياسي قىزمەتىن تاشكەنت قالاسىندا سەميناريا وقۋشىلارىنان قۇرىلعان «كەڭەس» اتتى استىرتىن جاستار ۇيىمىن قۇرۋدان باستاعان.
1917 جىلى كوكتەمدە تاشكەنتتە مۇستافا شوقاي، ق.قوجىقوۆ، ق.بولعانبايەۆ، س.اقايەۆپەن بىرگە «بىرلىك تۋى» گازەتىن شىعاردى. ولكەدە كەڭەستىك بيلىك تۇسىندا بولعان اشارشىلىققا قارسى كۇرەستە بەلسەندىلىك تانىتتى. س.قوجانوۆ 1920-1924 جىلدارى تۇركىستان كومپارتياسى وك مۇشەسى، تۇركىستان ورتالىق اتقارۋ كوميتەتى ءتوراعاسىنىڭ ورىنباسارى، تۇركىستان رەسپۋبليكاسىنىڭ ىشكى ىستەر حالىق كوميسسارى، حالىق اعارتۋ حالىق كوميسسارى، «اقجول» گازەتىنىڭ رەداكتورى بولادى. 1924-1925 جىلدارى قازاق ولكەلىك پارتيا كوميتەتىنىڭ حاتشىسى، 1925-1926 جىلدارى بك/ب/پ وك ۇلت رەسپۋبليكالارى مەن وبلىستارى بويىنشا جاۋاپتى نۇسقاۋشىسى، ماسكەۋ ماركسيزم-لەنينيزم كۋرسىنىڭ تىڭداۋشىسى، 1928 جىلى بك/ب/پ وك ورتا ازيا بيۋروسىنىڭ ۇگىت-ناسيحات ءبولىمى مەڭگەرۋشىسىنىڭ ورىنباسارى، 1929-1931 جىلدارى ورتا ازيا ماقتا-يرريگاسيا پوليتەحنيكالىق ينستيتۋتىنىڭ العاشقى ديرەكتورى، 1931-1932 جىلدارى ورتا ازيا ماقتا ورتالىعى باسقارماسىنىڭ ءتوراعاسى، 1932-1933 جىلدارى ماسكەۋدە وداقتىق ماقتا ونىمدەرى باسقارماسىنىڭ ورىنباسارى، 1933-1934 جىلدارى كسرو حكس ماقتا توبى باسشىسىنىڭ ورىنباسارى، 1934 جىلى كەڭەستىك باقىلاۋ كوميسسياسىنىڭ وزبەكستان بويىنشا وكىلى بولىپ قىزمەت اتقارادى.
ونىڭ شىعارماشىلىعىندا «نەنى ايتايىن؟»، «كىم جاۋاپكەر؟»، «كورەمىز!»، «شىنعا ۇقساعان پىكىرلەر»، «بۇل كىم؟»، «ءتىلماشتارعا ءبىر سىن» ت.ب. ولەڭدەرى مەن ك.بالمونت، ەزوپ (د.بەدنىي تارجىمەسى) تۋىندىلارىنان قازاقشا سويلەتكەن اۋدارمالارى بار.
قايراتكەر 1937 جىلى 16 شىلدەدە ۇستالىپ، 1938 جىلى 8 اقپاندا اتىلعان.