سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ باس پروكۋرور بەرىك اسىلوۆتىڭ توراعالىعىمەن وتكەن سۋدىڭ «قارا نارىعىنا» قارسى كۇرەس ماسەلەلەرى جونىندەگى ۆەدومستۆوارالىق كەڭەسكە قاتىستى، - دەپ حابارلايدى aqshamnews.kz.
Cالا مينيسترلىگىنىڭ مالىمەتىنشە، جيىنعا سونداي-اق اۋىل شارۋاشىلىعى مەن ەكولوگيا جانە تابيعي رەسۋرستار مينيسترلەرى، قۇقىق قورعاۋ ورگاندارىنىڭ باسشىلارى جانە وبلىس اكىمدەرىنىڭ ورىنباسارلارى قاتىستى.
ۋاكىلەتتى مەملەكەتتىك جانە قۇقىق قورعاۋ ورگاندارىنىڭ باسشىلارى زاڭسىز سۋ الۋ فاكتىلەرىن جويۋ باعىتىنداعى بىرلەسكەن ءىس-قيمىل مەن جوسپارلاردى تالقىلادى. كەڭەستە انىقتالعان زاڭبۇزۋشىلىقتار، قابىلدانعان شارالار جانە رۇقساتسىز سۋ پايدالانۋعا قارسى كۇرەستىڭ سوڭعى ناتيجەلەرى تۋرالى باياندامالار تىڭدالدى.
مەملەكەت باسشىسىنىڭ سۋدىڭ «قارا نارىعىن» جويۋ جونىندەگى تاپسىرماسىن ورىنداۋ ماقساتىندا سۋ رەسۋرستارى جانە يرريگاسيا مينيسترلىگى مەن باس پروكۋراتۋرا جول كارتاسىن ازىرلەدى. وندا سۋ رەسۋرستارىنا اۋديت جۇرگىزۋ، زاڭسىز سۋ الۋ ءقاۋپى جوعارى ايماقتاردىڭ كارتاسىن جاساۋ، سۋ شارۋاشىلىعى ينفراقۇرىلىمىن دامىتۋعا بولىنگەن قارجىعا تەكسەرۋ جۇرگىزۋ، سۋ ۇنەمدەۋ تەحنولوگيالارىن ەنگىزۋ جانە سىبايلاس جەمقورلىققا قارسى شارالار كوزدەلگەن.
سونىمەن قاتار رەسپۋبليكالىق جانە وڭىرلىك دەڭگەيلەردە ۆەدومستۆوارالىق جۇمىس توپتارى قۇرىلادى. ولاردىڭ قۇرامىنا جەدەل-ىزدەستىرۋ وكىلەتتىگى مەن ءتيىستى قۇرالدارى بار قۇقىق قورعاۋ ورگاندارىنىڭ وكىلدەرى كىرەدى.
جۇمىستىڭ تاعى ءبىر ماڭىزدى باعىتى – سۋارمالى سۋدى باسقارۋ جانە ءبولۋ پروسەستەرىن سيفرلاندىرۋ، سونداي-اق سيفرلىق جانە سپۋتنيكتىك مونيتورينگ پەن ەسەپكە الۋ قۇرالدارىن ەنگىزۋ بولماق. ۆەدومستۆوارالىق ءوزارا ءىس-قيمىل كۇشەيتىلىپ، قۇقىق قورعاۋ جانە مەملەكەتتىك ورگاندار اراسىندا مىندەتتى دەرەكتەر الماسۋ قامتاماسىز ەتىلەدى.
اگرارلىق سالادا سۋ پايدالانۋ ليميتتەرىنىڭ ساقتالۋىنا جانە وسىرىلەتىن اۋىل شارۋاشىلىعى داقىلدارىن ءارتاراپتاندىرۋ بويىنشا بەلگىلەنگەن كورسەتكىشتەردىڭ ورىندالۋىنا تولىق باقىلاۋ ورناتۋ جوسپارلانىپ وتىر.
«وتكەن جىل سۋدىڭ «قارا نارىعىن» جويۋ ءۇشىن كەشەندى شارالار، ياعني ۋاكىلەتتى مەملەكەتتىك جانە قۇقىق قورعاۋ ورگاندارىنىڭ ۇيلەستىرىلگەن ءىس-قيمىلى قاجەت ەكەنىن كورسەتتى. قۇقىق قورعاۋ جۇيەسىنىڭ وزەگى سانالاتىن پروكۋراتۋرا ورگاندارىنىڭ قولداۋى اسا ماڭىزدى. زاڭ بۇزعان بىردە-بىر ادام جازاسىز قالماۋى ءتيىس. ازىرلەنگەن جول كارتاسى وسى باعىتتا ءتيىمدى قۇرال بولادى دەپ سەنەمىن»، – دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.