2026 جىلدىڭ باسىنان باستاپ قازاقستاندا مەديسينالىق-الەۋمەتتىك ساراپتاما شەڭبەرىندە مۇگەدەكتىكتءى بەلگىلەۋگە قاتىستى 9،1 مىڭ ءوتىنىم سىرتتاي فورماتتا قارالدى، - دەپ حابارلايدى Aqshamnews.kz.
2025 جىلى سىرتتاي فورماتتا 113،1 مىڭ ءوتىنىم قارالىپ، بۇل كۋالاندىرۋدان وتكەن مۇگەدەكتىگى بار ادامداردىڭ جالپى سانىنىڭ 42،5 پايىزىن قۇرادى.
سىرتتاي پرواكتيۆتى كۋالاندىرۋ ءبىرقاتار نوزولوگيالىق نىساندار بويىنشا قولدانىلادى. ولاردىڭ قاتارىنا ونكولوگيالىق اۋرۋلار، بارلىق لوكاليزاسياداعى تۋبەركۋلەز، تۋا بىتكەن جانە جۇرە پايدا بولعان اناتوميالىق دامۋ كەمىستىكتەرى، پسيحيكالىق اۋرۋلار، بالالارداعى ءبىرىنشى ءتيپتى قانت ديابەتى، بالالارداعى مۋكوپوليساحاريدوز، سونداي-اق اعزا ترانسپلانتاسياسىنان كەيىنگى جاعدايلار كىرەدى.
2025 جىلى نوزولوگيالىق نىساندار تىزبەسى ەداۋىر كەڭەيتىلدى. وعان شىنايى گيدروسەفاليا، ءبىر نەمەسە بىرنەشە اياق-قولدىڭ تۇراقتى ايقىن سالدانۋى نەمەسە تەرەڭ پارەزدەرى سياقتى اۋرۋلار ەنگىزىلدى.
وسىلايشا، قازىرگى تاڭدا سىرتتاي فورماتتاعى كۋالاندىرۋ 50-دەن استام نوزولوگيالىق نىسان بويىنشا جۇرگىزىلەدى.
بۇعان دەيىن حابارلانعانداي، ۇلتتىق قوعامدىق سەنىم كەڭەسىنىڭ VI وتىرىسىندا مەملەكەت باسشىسى ەرەكشە قاجەتتىلىكتەرى بار ادامدار ءۇشىن بارىنشا قولايلى جاعداي جاساۋدى، ولاردىڭ ينستانسيالار مەن قاعازباستىلىق بويىنشا ءجۇرۋىن، سونداي-اق كورسەتىلەتىن قىزمەتتى بەرۋشىلەردىڭ قىزمەت الۋشىلارمەن بايلانىسىن بولدىرماۋدى تاپسىردى.
اتالعان تاپسىرمانى ورىنداۋ ماقساتىندا قازاقستاندا مەديسينالىق-الەۋمەتتىك ساراپتامانىڭ سىرتتاي فورماتى ەنگىزىلدى. بۇل جاعدايدا ءوتىنىش بەرۋشىگە تەك تىركەلگەن جەرى بويىنشا مەديسينالىق ۇيىمعا جۇگىنىپ، قاجەتتى تەكسەرۋدەن ءوتۋ جەتكىلىكتى.
قۇجاتتاردى جولداۋدان باستاپ ساراپتامالىق شەشىم شىعارۋعا دەيىنگى بارلىق كەيىنگى كەزەڭدەر ازاماتتىڭ جەكە قاتىسۋىنسىز، اقپاراتتىق جۇيەلەردىڭ ينتەگراسياسى ارقىلى جۇزەگە اسىرىلادى. №031/ۋ نىسانىنداعى مەديسينالىق قۇجاتتار مەديسينالىق ۇيىمداردان ءماس بولىمشەلەرىنە ەلەكتروندىق فورماتتا جولدانادى.
سىرتتاي كۋالاندىرۋعا كوشۋ:
- - اكىمشىلىك جانە بيۋروكراتيالىق كەدەرگىلەردى جويادى؛
- - ءماس ساراپتامالىق شەشىمدەرىنىڭ اشىقتىعىن قامتاماسىز ەتەدى؛
- - مۇگەدەكتىكتى بەلگىلەۋ جانە مۇگەدەكتىگى بار ادامداردى الەۋمەتتىك قورعاۋ شارالارىن انىقتاۋ بويىنشا قىزمەتتەردى ۇيدەن شىقپاي-اق الۋعا مۇمكىندىك بەرەدى؛
- - كورسەتىلەتىن قىزمەتتى الۋشىنىڭ كورسەتىلەتىن قىزمەتتى بەرۋشىمەن تىكەلەي بايلانىسىن بولدىرمايدى، سول ارقىلى سىبايلاس جەمقورلىق تاۋەكەلدەرىن ازايتادى.