سەنات دەپۋتاتتارىنىڭ ساۋالىنا جاۋاپ بەرگەن پرەمەر-مينيستردىڭ ورىنباسارى – ساۋدا جانە ينتەگراسيا ءمينيسترى سەرىك جۇمانعارين Qoldau.kz پلاتفورماسىن Gosagro.kz-پەن بىرگە سۋبسيديا وتىنىمدەرىن قابىلداۋعا پايدالانۋ ءتيىمسىز دەپ ەسەپتەيتىنىن ءمالىم ەتتى، دەپ حابارلايدى almaty-akshamy.kz قازاقپاراتقا سىلتەمە جاساپ.
بۇعان دەيىن سەنات دەپۋتاتتارى Gosagro.kz مەملەكەتتىك سۋبسيديالاۋدىڭ اقپارات جۇيەسىندە كەمشىلىكتەر بار دەپ ەسەپتەيتىندەرىن اتاپ، ونداعى كەمشىلىكتەر جويىلعانشا ورنىنا Qoldau.kz پلاتفورماسىن پايدالانا تۇرۋدى ۇسىنعان بولاتىن.
سەرىك جۇمانعارين جاۋابىندا سول ۇسىنىسقا بايلانىستى ۇكمەت ۇستانىمىن بىلدىرگەن.
«اۋىل شارۋاشىلىعى مينيسترلىگى Gosagro.kz مەملەكەتتىك سۋبسيديالاۋدىڭ اقپارات جۇيەسىندەگى اۋىل شارۋاشىلىعى تاۋارىن وندىرۋشىلەردەن سۋبسيديا وتىنىمدەرىن قابىلداۋ كەزىندە تۋىنداعان بۇكىل اقاۋلاردى تولىعىمەن جويدى. قازىرگى تاڭدا اقپارات جۇيە شتاتتىق رەجيمدە جۇمىس ىستەپ تۇر. تۇسكەن وتىنىمدەر سانى –5 500، ولاردىڭ سوماسى – 17،4 ملرد تەڭگە. جەرگىلىكتى اتقارۋشى ورگاندار سونىڭ 1،3 ملرد تەڭگەسىن ماقۇلدادى»، - دەپ جازىلعان جاۋاپتا.
ۆيسە-پرەمەردىڭ ايتۋىنشا، مولشەرلەمەنى سۋبسيديالاۋعا قارجىلىق ينستيتۋتتاردان 4 ملرد تەڭگەنىڭ ءوتىنىمى تۇسكەن.
«تۇركىستان، قاراعاندى، اتىراۋ، جامبىل، سولتۇستىك قازاقستان جانە اقمولا وبلىستارىندا اقپان ايىنان باستاپاۋىل شارۋاشىلىعى تاۋارلارىن وندىرۋشىلەرگە ءتيىستى سۋبسيديالار تولەنە باستادى. سونىمەن بىرگە Gosagro.kz مەملەكەتتىك سۋبسيديالاۋدىڭ اقپارات جۇيەسىنە كىرىپ، ءوتىنىم راسىمدەۋ اۋىل شارۋاشىلىعى تاۋارلارىن وندىرۋشىلەرگە دە، جەرگىلىكتى اتقارۋشى ورگاندارعا دا تەگىن ەكەنىن اتاپ ءوتۋ كەرەك. وسى ايتىلعانداردى ەسكەرسەك، «Qoldau.kz» پلاتفورماسىن سۋبسيديا وتىنىمدەرىن قابىلداۋعا Gosagro.kz اقپارات جۇيەسىمەن قاتار پايدالانۋ ءتيىمسىز»، - دەپ جازادى سەرىك جۇمانعارين.