كەلەسى جىلى «قازسۋشار» مەكەمەسىنىڭ 105 مامانى قحر-دا بىلىكتىلىك ارتتىرۋ كۋرستارىنان وتەدى.
سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ قىتايلىق Power China كومپانياسىنىڭ قازاقستانداعى وكىلدەرىمەن كەزدەسۋ بارىسىندا ءتيىستى كەلىسىمگە قول جەتكىزدى، دەپ حابارلايدى aqshamnews.kz سۋ رەسۋرستارى جانە يرريگاسيا مينيسترلىگىنە سىلتەمە جاساپ.
ارنايى كۋرستار توقسان سايىن وتەدى. ءساۋىر ايىندا قىتايعا 30 مامان بارادى. سودان كەيىن 25 ادامنان جاساقتالاتىن توپتار ءار ءۇش اي سايىن بىلىكتىلىك ارتتىرۋ باعدارلاماسىنا قاتىسادى. جاقىن ارادا تاراپتار وقۋ باعدارلامالارىنىڭ تاقىرىبى مەن باعىت-باعدارىن ايقىندايتىن بولادى.
«شەتەلدىك كومپانيالارمەن جانە وزگە مەملەكەتتەرمەن كەلىسسوزدەر بارىسىندا مىندەتتى تاقىرىپتىڭ ءبىرى – بىرلەسىپ كادر دايارلاۋ جانە مامانداردىڭ بىلىكتىلىگىن ارتتىرۋ. ءبىزدىڭ ماماندار قىتايدا مول تاجىريبە جينايتىنىنا سەنىمدىمىن. بيىل مينيسترلىك سۋ شارۋاشىلىعى قىزمەتكەرلەرىنىڭ بىلىكتىلىگىن ارتتىرۋ جۇمىسىن بەلسەندى جۇرگىزدى. مىسالى، جىل باسىنان بەرى 500-دەن استام ادام مامانداندىرىلعان ورتالىقتاردا كۋرستان ءوتتى. بۇل باستاپقى جوسپاردان 12%-عا ارتىق»، - دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.
سونداي-اق، مينيستر قىتايلىق كاسىپكەرلەرمەن Power China كومپانياسىنىڭ ەلىمىزدە سۋ قويمالارىن سالۋ جانە رەكونسترۋكسيالاۋ جۇمىستارىنا قاتىسۋ ماسەلەسىن تالقىلادى. شەتەلدىك دەلەگاتتار قازاقستاندا جاڭا سۋ شارۋاشىلىعى ينفراقۇرىلىمىنا ينۆەستيسيا سالۋعا دايىن ەكەندىكتەرىن ءبىلدىردى.