كليماتتىڭ وزگەرۋىنە بەيىمدەلۋ، سۋدىڭ «كولەڭكەلى نارىعىمەن» كۇرەستى كۇشەيتۋ، سۋ رەسۋرستارىن باسقارۋدا قوعامدىق باقىلاۋ: جاڭا سۋ كودەكسىندەگى باستى جاڭالىقتار
جاڭا سۋ كودەكسى بەس نەگىزگى قاعيداتقا سۇيەنە وتىرىپ ازىرلەندى. ولار: سۋدى قورشاعان ورتانىڭ اجىراماس بولىگى جانە ازاماتتاردىڭ ءومىر ءسۇرۋى مەن ەكونوميكالىق دامۋدىڭ نەگىزى رەتىندە تانۋ، سۋ رەسۋرستارىن پايدالانۋداعى ەكونوميكالىق قۇندىلىق، جەرۇستى جانە جەراستى سۋ رەسۋرستارىن كەشەندى پايدالانۋ، سۋدى ءتيىمدى جانە ۇتىمدى ۇنەمدەۋ، سونداي-اق سۋ قورىن ساقتاۋ مەن پايدالانۋ ماسەلەلەرىن شەشۋگە جۇرتشىلىقتى تارتۋ.
جاڭا كودەكستە سۋ رەسۋرستارىن باسقارۋ بويىنشا باس جانە باسسەيندىك جوسپارلار جاساۋ كوزدەلگەن. سونىمەن قاتار گيدروتەحنيكالىق قۇرىلىستاردى جان-جاقتى تەكسەرىپ، ولاردىڭ قاۋىپسىزدىگى تۋرالى ارنايى قۇجات دايىنداۋ مىندەتى ەنگىزىلىپ وتىر. بۇل نىسانداردىڭ ءتىزىمى دە جۇيەگە كەلتىرىلمەك.
سۋ سالاسىنداعى زاڭ بۇزۋشىلىقتار ءۇشىن جاۋاپكەرشىلىك تالاپتارى كۇشەيتىلدى. ۋاكىلەتتى ورگاندارعا جەدەل ارەكەت ەتۋگە مۇمكىندىك بەرەتىن قاداعالاۋ فۋنكسيالارى ەنگىزىلدى. سۋدىڭ «كولەڭكەلى نارىعىمەن» كۇرەسۋ ءۇشىن سۋدى رۇقساتسىز پايدالانۋعا جول بەرمەۋ جانە سۋ ايدىندارىندا، سۋ قورعاۋ ايماقتارى مەن بەلدەۋلەرىندە شارۋاشىلىق قىزمەتكە تىيىم سالۋدى ساقتاۋ بويىنشا باقىلاۋ كۇشەيتىلدى.
اۋىل شارۋاشىلىعىنداعى ءتيىمسىز شىعىنداردى ازايتۋ ماسەلەلەرى قارالدى. يرريگاسيالىق كوندومينيۋم قۇرۋ ءتارتىبى رەتتەلدى. ەگەر ونداي ۇيىم قۇرىلماسا، مۇنداي مۇلىكتى سىرتتاي باسقارۋ قۇقىعى جەرگىلىكتى اتقارۋشى ورگاندارعا بەرىلەدى.
سۋ سەكتورىن سۋ تاسقىنى مەن قۇرعاقشىلىقتىڭ الدىن الۋ ءۇشىن كليماتتىڭ وزگەرۋىنە بەيىمدەۋ شارالارى رەتتەلدى. سۋ سالاسىن سيفرلاندىرۋ اياسىندا ۇلتتىق اقپاراتتىق جۇيە قۇرۋ كوزدەلىپ وتىر.
سۋ شارۋاشىلىعى قۇرىلىستارىن ەسەپكە الۋ، ولاردىڭ جاعدايىن باعالاۋ، بالامالى سۋ كوزدەرىن پايدالانۋ، ەرىگەن قار سۋىن ارنايى رۇقساتسىز جيناۋ جانە سۋارۋعا پايدالانۋ، سۋ نىساندارىن باقىلاۋ بويىنشا ناقتى نورمالار ەنگىزىلدى.
كودەكس سۋمەن جابدىقتاۋ جانە سۋ بۇرۋ جۇيەلەرىن دامىتۋ، نوسەر جانە درەناجدىق اعىنداردى رەتتەۋ، يەسىز جۇيەلەردى كوممۋنالدىق مەنشىككە بەرۋ جونىندەگى نورمالاردى قامتيدى. سونداي-اق ونەركاسىپتىك قاجەتتىلىكتەر ءۇشىن اۋىز سۋدىڭ ورنىنا تەحنيكالىق سۋدى پايدالانۋ جانە تەحنيكالىق اۋديت نەگىزىندە سۋمەن جابدىقتاۋ جانە سۋ بۇرۋ ينفراقۇرىلىمىن جوسپارلى جاڭارتۋ شارالارى كوزدەلگەن.
جەراستى سۋلارىن ىزدەۋ، باعالاۋ، باقىلاۋ جانە قورعاۋ جۇمىستارىن رەتتەۋ ەندى مينيسترلىكتىڭ قۇزىرەتىنە بەرىلەدى. بۇل ماسەلەلەرمەن سۋ رەسۋرستارى جانە يرريگاسيا مينيسترلىگىنىڭ قۇرامىنداعى ۇلتتىق گيدروگەولوگيالىق قىزمەت اينالىسادى.
سۋ رەسۋرستارىن باسقارۋ شەشىمدەرىنە جۇرتشىلىقتىڭ قاتىسۋى كەڭەيتىلدى. باسسەيندىك كەڭەستەر سۋ پايدالانۋدىڭ رۇقسات ەتىلگەن كولەمدەرىن قىسقارتۋ، سۋ تاسقىنى مەن قۇرعاقشىلىققا قارسى ءىس-شارالار، سونداي-اق جەرگىلىكتى اتقارۋشى ورگان جىبەرگەن بۇزۋشىلىقتاردى تۇزەتۋ جونىندە ۇسىنىستار بەرە الادى.