1 مامىردان سۋ رەسۋرستارى جانە يرريگاسيا مينيسترلىگىنىڭ «قازسۋشار» مەكەمەسى قىزمەتكەرلەرىنىڭ ايلىعى ورتا ەسەپپەن 25%-عا ءوستى.
اتاپ ايتقاندا، ەڭبەكاقىسى رەسپۋبليكالىق بيۋدجەتتەن تولەنەتىن مامانداردىڭ ايلىقتارى كوبەيدى.
ەسكە سالا كەتسەك، وسى جىلدىڭ 1 قاڭتارىنان ايلىقتارى تاريف ەسەبىنەن تولەنەتىن «قازسۋشار» ماماندارىنىڭ ەڭبەكاقىلارى ورتا ەسەپپەن 23%-عا كوتەرىلگەن ەدى. ناتيجەسىندە، كاسىپورىن قىزمەتكەرلەرىنىڭ جالپى سانىنىڭ 47%-ىنىڭ ايلىقتارى ۇلعايدى. بۇل ارنالار ارقىلى سۋارمالى سۋ جەتكىزۋدى قامتاماسىز ەتەتىن ماماندار.
«مينيسترلىك كادر جەتىسپەۋشىلىگى ماسەلەسىن شەشۋ ماقساتىندا سۋ سالاسى ماماندىقتارىنىڭ تارتىمدىلىعىن ارتتىرۋ ءۇشىن ءبىرقاتار ءىس-شارالاردى جۇزەگە اسىرۋدا. ماسەلەن، «قازسۋشار» قىزمەتكەرلەرىنىڭ ەڭبەكاقىسى رەسپۋبليكالىق بيۋدجەتتەن جانە تاريف ەسەبىنەن دە كەزەڭ-كەزەڭىمەن ۇلعايىپ جاتىر. بۇدان بولەك، سالاداعى ماماندار بىلىكتىلىك ارتتىرۋ كۋرستارىنان وتەدى. بيىل 450 مامان ارنايى كۋرستاردان ءوتۋى ءتيىس»، - دەدى سۋ رەسۋرستارى جانە يرريگاسيا مينيسترلىگىنىڭ رەسمي وكىلى ءمولدىر ابدۋالييەۆا.