ءقازىر بۇل سالاداعى ورتاشا جالاقى – 210 مىڭ تەڭگە.
سۋ شارۋاشىلىعى سالاسى ماماندارىنىڭ جالاقىسى ەنەرگەتيكا جانە جىلۋ ەنەرگەتيكا قىزمەتكەرلەرىنىڭ ايلىعىمەن تەڭەستىرىلەدى، دەپ حابارلايدى aqshamnews.kz
بۇل تۋرالى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ ايتتى.
ءماجىلىس دەپۋتاتى جۇلدىز سۇلەيمەنوۆا سۋ سالاسىندا 3 مىڭعا جۋىق ينجەنەر-گيدروتەحنيك، يرريگاتور، سۋ رەسۋرستارىن باسقارۋ مامانى قاجەت ەكەنىن ايتتى. ونىڭ دەرەگىنشە، سالادا جىل سايىن 200-گە جۋىق مامان عانا دايارلانادى.
"بۇل سالانىڭ 7% سۇرانىسىن عانا جابادى. بىلتىر 500-دەن استام ستۋدەنت سۋ شارۋاشىلىعى ماماندىقتارىنا بارعان. ءبىراق بۇگىندە سۋ شارۋاشىلىعىندا جالاقى باسقا كوممۋنالدىق سالاداعى جالاقىدان ايتارلىقتاي تومەن. بۇل سوڭعى ون جىلدا سالادان 30% ماماننىڭ كەتىپ قالۋىنا سەبەپ بولىپ، جاستاردىڭ كەلۋىنە ۇلكەن كەدەرگى بولىپ وتىر"، - دەدى دەپۋتات ماجىلىستە وتكەن ۇكىمەت ساعاتىندا.
سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ بىلتىرعا دەيىن سالادا جالاقى تومەن بولعانىن ايتتى. وتكەن جىلدىڭ 1 مامىرىنان باستاپ "قازسۋشاردا" جۇمىس ىستەيتىن 10 مىڭنان استام ماماننىڭ جالاقىسى 25%-عا كوتەرىلگەن.
"ءقازىر "قازسۋشاردا" ورتاشا جالاقى 210 مىڭ تەڭگەگە تەڭ. ءبىز "تابيعي مونوپوليالار تۋرالى" زاڭعا وزگەرىستەر ەنگىزىپ جاتىرمىز. قۇجات سەناتتىڭ قاراۋىندا. ءبىز سۋ شارۋاشىلىعى سالاسى ماماندارىنىڭ جالاقىسىن ەنەرگەتيكا جانە جىلۋ ەنەرگەتيكا سالاسى ماماندارىنىڭ ايلىعىمەن تەڭەستىرەمىز. بۇل مامانداردىڭ ايلىعىن تاعى دا 50%-دان استامعا كوتەرۋگە مۇمكىندىك بەرەدى. وسىلايشا جىلدىڭ ەكىنشى جارتىسىندا مامانداردىڭ جالاقىسىن قوسىمشا 50%-عا كوتەرەمىز دەپ جوسپارلاپ وتىرمىز"، - دەدى ۆەدومستۆو باسشىسى.
ەندى سالاداعى قىزمەتكەرلەردىڭ ايلىعى ورتاشا العاندا 310-320 مىڭ تەڭگەگە دەيىن بارۋى مۇمكىن.
"ايلىق كوتەرىلسە، ماماندار سالاعا كەلەدى"، - دەپ قورىتىندىلادى نۇرجان نۇرجىگىتوۆ.