قازاقستاندىق سۋ سالاسىنىڭ 30 مامانى قحر-دا ەكى اپتاعا سوزىلعان بىلىكتىلىك ارتتىرۋ كۋرسىن اياقتادى.
سونىمەن قاتار اقش-تا ءبىر ايلىق وقۋدان وتكەن ماماندار توبى دا ەلگە ورالدى، دەپ حابارلايدى aqshamnews.kz.
سۋ رەسۋرستارى جانە يرريگاسيا مينيسترلىگىنىڭ وكىلدەرى شەتەلدەن ورالعان ماماندارمەن كەزدەستى. الداعى ۋاقىتتا ولار ارىپتەستەرى شەتەلدە جيناعان تاجىريبەنى مەڭگەرىپ، ءوز قىزمەتتەرىندە قولدانادى.
بارلىق كۋرستار قابىلداۋشى ەلدەر ەسەبىنەن، حالىقارالىق كەلىسىمدەر مەن باعدارلامالار اياسىندا ۇيىمداستىرعانىن ايتا كەتەيىك. بۇل شارالارعا مەملەكەتتىك بيۋدجەتتەن قاراجات بولىنگەن جوق.
جىل سوڭىنا دەيىن قىتايعا 25 ادامنان تۇراتىن تاعى ءۇش توپ جىبەرىلەدى. بۇگىندە سۋ رەسۋرستارى جانە يرريگاسيا مينيسترلىگى وزگە دە ەلدەردە وسىنداي كۋرستار ۇيىمداستىرۋ بويىنشا بەلسەندى كەلىسسوزدەر جۇرگىزىپ جاتىر.
سونىمەن قاتار The International Visitor Leadership Program حالىقارالىق الماسۋ باعدارلاماسى اياسىندا قازاقستاندىق ماماندار اقش-قا بارىپ، سۋ رەسۋرستارىن باسقارۋ جۇيەسىن جەتىلدىرۋ جولدارىن زەرتتەدى.
«تەحنولوگيا مەن سيفرلاندىرۋدىڭ دامۋىنا بايلانىستى سۋ سالاسى ماماندارىن قايتا دايارلاۋعا دەگەن سۇرانىس ارتىپ وتىر. قازاقستان الدىڭعى قاتارلى ەلدەردىڭ تاجىريبەسىن بەلسەندى تۇردە مەڭگەرۋگە ۇمتىلىپ جاتىر. بۇل تۇرعىدا قىتايدى الەمدىك كوشباسشى دەپ اتاۋعا بولادى. قحر-دا سۋ ينفراقۇرىلىمدارى جاقسى دامىعان ءارى وزىندىك ەرەكشەلىكتەرى بار. سونىمەن قاتار ولار سۋ سالاسىنداعى بىلىكتى مامانداردى دايىنداۋدىڭ ءتيىمدى ادىستەرىن قولدانادى. سوندىقتان قىتايدىڭ بۇل تاجىريبەسى ءبىزدىڭ سۋ ماماندارى ءۇشىن وتە پايدالى»، – دەدى سۋ رەسۋرستارى جانە يرريگاسيا ۆيسە-مينيسترى اسلان ابدرايموۆ.