الماتىدا رەسپۋبليكالىق «تازا قازاقستان» باعدارلاماسى مەن «الماتى – ءبىزدىڭ ورتاق ءۇيىمىز» كۇزگى كامپانياسى اياسىندا اقساي جانە قارعالى وزەندەرىنىڭ ارنالارىن تازالاۋ جۇمىستارى جۇرگىزىلدى.
قابىلدانعان شارالار سۋ تاسقىنى مەن ارنالاردىڭ بىتەلۋىنىڭ الدىن الۋدا ماڭىزدى ءرول اتقارادى، اسىرەسە كليماتتىڭ وزگەرۋىنە جانە جاۋىن-شاشىننىڭ قارقىندىلىعىنىڭ ارتۋىنا بايلانىستى جاعدايلاردا، دەپ حابارلايدى aqshamnews.kz.
كۇزگى-قىسقى كەزەڭگە دايىندىق وزەن ارنالارىنىڭ جاعدايىن تالداۋدان جانە پروبلەمالى ۋچاسكەلەردى انىقتاۋدان باستالدى. ناتيجەسىندە تازالاۋ جۇمىستارى 6000 م² اۋماقتى قامتىدى. تاپسىرمالاردى ورىنداۋ ءۇشىن، ەكسكاۆاتورلار مەن جۇك كولىكتەرىن قوسا العاندا، 6 بىرلىك ارنايى تەحنيكا مەن 15 بىلىكتى جول جۇمىسشىسى جۇمىلدىرىلدى.
وزەندەردى تازالاۋ بارىسىندا 150 م³ قوقىس، سونىڭ ىشىندە پلاستيكالىق قالدىقتار، قۇرىلىس ماتەريالدارى جانە وسىمدىكتەر جينالىپ، شىعارىلدى، بۇل سۋ وتكىزگىشتىكتى ەداۋىر جاقسارتىپ، الداعى كۇزگى-قىسقى ايلاردا سۋ تاسقىنى ءقاۋپىن ازايتادى. سونىمەن قاتار، وزەن ارنالارىنىڭ تازالانۋى سۋ قويمالارىنىڭ ەكولوگيالىق جاعدايىن جاقسارتۋعا جانە ولاردىڭ بيولوگيالىق بەلسەندىلىگىن ارتتىرۋعا ىقپال ەتەدى.
وزەن ارنالارىنىڭ كۇتىمىنە قاتىستى جۇمىستار قالانىڭ تۇرعىندارى ءۇشىن ءقاۋىپسىز جانە قولايلى ءومىر ءسۇرۋ جاعدايلارىن قامتاماسىز ەتۋ ماقساتىندا كەشەندى تۇردە جالعاسادى.
ەسكە سالا كەتەيىك، الماتىدا «جارقىن كۇز» اكسياسى – «الماتى – ناش وبششيي دوم» كۇزگى كامپانياسى اياسىندا كۇزگى-قىسقى كەزەڭگە بەلسەندى دايىندىق جۇمىستارى جۇرگىزىلۋدە. اكسيا ەكولوگيالىق جاۋاپكەرشىلىكتى ارتتىرۋعا جانە قالانى تازا ۇستاۋ ماسەلەلەرىنە جۇرتشىلىقتىڭ نازارىن اۋدارۋعا باعىتتالعان.
