بۇل باستامانى ىسكە اسىرۋ ءۇشىن زاڭناماعا وزگەرىس ەنگىزۋ كەرەك.
عىلىم جانە جوعارى ءبىلىم ءمينيسترى ساياسات نۇربەك كەلەسى جىلدان باستاپ جوعارى ءبىلىم الۋعا 2-3 پروسەنتتىك كرەديت بەرىلەتىنىن ايتتى، دەپ حابارلايدى Almaty-akshamy.kz
رەسمي مالىمەتكە سايكەس، بيىل گرانت سانى وتكەن جىلمەن سالىستىرعاندا 19 پروسەنتكە ءوسىپ، 88 مىڭعا جەتتى. الايدا اقىلى تۇردە وقيتىن ستۋدەنتتەر دە از ەمەس. ولاردىڭ سانى 60 پروسەنتتى قۇراپ وتىر. وسىعان بايلانىستى توقايەۆ سوڭعى جولداۋىندا 2-3 پروسەنتتىك كرەديت بەرۋ ماسەلەسىن قاراستىرۋدى تاپسىرعان بولاتىن.
عىلىم جانە جوعارى ءبىلىم ءمينيسترى ساياسات نۇربەكتىڭ ايتۋىنشا، بۇرىن ونداي مەحانيزم بولعان. ونى قايتادان جانداندىرۋ قاجەت.
«مەن ءوزىم ەۋرازيا ۇلتتىق ۋنيۆەرسيتەتىندە كرەديتپەن وقىعانمىن. قازاقستاندا 90-جىلداردىڭ سوڭىندا سونداي ءبىر جاقسى مودەل بولعان. ارتىنان توقتاپ قالدى. ءبىز ونىڭ سەبەبىن دە بىلەمىز. ەندى وسى جۇيەنى قايتا قاراپ، جىلدىق مولشەرلەمەسى 2-3 پروسەنت بولاتىن كرەديت بەرەمىز. ءقازىر ءتيىستى وزگەرىستەر مەن تەتىكتەر ازىرلەنىپ جاتىر. كەلەسى جىلدان باستاپ ەنگىزىلەدى»، - دەدى نۇربەك ورتالىق كوممۋنيكاسيالار قىزمەتىندە وتكەن بريفينگتە.
بيىل رەسپۋبليكا بويىنشا 177 مىڭعا جۋىق بالا ستۋدەنت اتاندى. بۇل كورسەتكىش وسە بەرەدى. ماسەلەن، وسى جىلى 400 مىڭعا جۋىق بالا ءبىرىنشى سىنىپقا باردى. ال 170 مىڭ وقۋشى مەكتەپ ءبىتىردى. بۇل - 10 جىلدان كەيىن مەكتەپ بىتىرۋشىلەر سانى ەكى جارىم ەسە ارتادى دەگەن ءسوز. جوعارى وقۋ ورىندارىنا كەلەتىن جاستار دا كوبەيەدى.