ستۋدەنتتەر ءۇشىن رف ۋنيۆەرسيتەتتەرى جوو تاڭداۋ كەزىندە قوسىمشا بالاما سانالادى
ءبىلىم جانە عىلىم ۆيسە-مينيسترى قۋانىش ەرعالييەۆ قازاقستاندا رەسەي ۋنيۆەرسيتەتتەرى فيليالدارىن اشۋعا قاتىستى ايتىلعان سىني پىكىرلەرگە ءۇن قاتتى، دەپ حابارلايدى Almaty-akshamy.kz.
ول ءوزىنىڭ Facebook-تەگى پاراقشاسى ارقىلى بۇل ماسەلەگە جان جاقتى توقتالدى.
«مەن بۇعان دەيىن ءبىلىم بەرۋ سەكتورىن جاقسارتۋ بويىنشا قازاقستان مەن رف اراسىنداعى سەرىكتەستىكتىڭ ءبىرقاتار نەگىزگى قاعيداتتارىن ءتۇسىندىرىپ وتكەنمىن. وسىعان بايلانىستى كوزقاراسىممەن ءبىرقاتار تولىقتىرۋلاردى جەتكىزگىم كەلىپ وتىر:
بىرىنشىدەن، ستراتەگيالىق سەرىكتەستىك، ەڭ الدىمەن، ەكى تاراپ ءۇشىن دە ءوزارا ءتيىمدى ورتاق ماقساتتار مەن مۇددەلەرگە قول جەتكىزۋگە باعىتتالعان. وتكەن كۇندەرى مەملەكەت باسشىسىنىڭ جۇمىس ساپارى اياسىندا قازاقستاندىق دەلەگاسيا قۇرامىندا ماسكەۋگە بارىپ قايتتىم. ساپار بارىسىندا رەسەيلىك ارىپتەستەرمەن ءبىرقاتار ماڭىزدى كەلىسىمگە قول جەتكىزىپ، سونىڭ ىشىندە ق ر ءبىلىم جانە عىلىم مينيسترلىگى مەن رف عىلىم جانە جوعارى ءبىلىم مينيسترلىگى اراسىنداعى ءوزارا تۇسىنىستىك تۋرالى مەموراندۋمعا قول قويىلدى. مەموراندۋم ق ر اۋماعىنداعى جەتەكشى رەسەيلىك جوعارى وقۋ ورىندارىنىڭ فيليالدارىن اشۋدى، سونداي-اق، ءوز كەزەگىندە رەسەيدە دە قازاقستاندىق جوو وكىلدىكتەرىن تەڭ نەگىزدە اشۋدى كوزدەيدى، بۇل ەكى تاراپ ءۇشىن دە تەپە-تەڭ قۇقىقتار مەن ورتاق جاعدايلاردى تۋعىزادى.
ەكىنشىدەن، مەملەكەت تاراپىنان ءبىلىم بەرۋ قىزمەتىن ليسەنزيالاۋ ەرەجەلەرىنە سايكەس بارلىق ستاندارتتار مەن ساپا دەڭگەيى ساقتالادى. ياعني، ق ر اۋماعىندا فيليالداردى اشقان كەزدە رەسەيلىك جوعارى وقۋ ورىندارى مامان دايارلاۋ جونىندەگى قازاقستاندىق ليسەنزيالاۋ ەرەجەلەرىن ەسكەرە وتىرىپ، قوس ليسەنزيالاۋ كوزدەلەتىن بولادى. بۇل ەكى ەلدىڭ ءوزارا مۇددەلەرى ەسكەرىلەتىن ەكىجاقتى ءتيىمدى ىنتىماقتاستىقتىڭ ايقىن كورىنىسى.
ۇشىنشىدەن، مەن بۇعان دەيىن دە ينجەنەرلىك-تەحنيكالىق بەيىندەگى جوعارى بىلىكتى كادرلاردىڭ قاجەتتىلىگىن ەسكەرە وتىرىپ، قازاقستانداعى جەتەكشى رەسەيلىك جوعارى وقۋ ورىندارىنىڭ فيليالدار جەلىسىن كەڭەيتۋ جانە رەسەيدە «بولاشاق» باعدارلاماسى Centre for International Programmes - Bolashaq بويىنشا ماماندار دايارلاۋ جوسپارلانعانىن جازعان ەدىم. الايدا، بۇل ءبىزدىڭ ستۋدەنتتەر الەمنىڭ جەتەكشى وقۋ ورىندارىندا وقي المايدى دەگەن ءسوز ەمەس. قازاقستاندىق ستۋدەنتتەر رەسەيلىك جوو قوسا، الەمنىڭ 27 ەلىنىڭ 200-دەن استام ۋنيۆەرسيتەتتەرىندە ۇزدىك ءبىلىم الۋ مۇمكىندىگىنە يە. ياعني ءبىزدىڭ ستۋدەنتتەر ءۇشىن رف ۋنيۆەرسيتەتتەرى جوو تاڭداۋ كەزىندە قوسىمشا بالاما سانالادى»، - دەيدى ول.
جالپى وزەكتى ماسەلەنى جان-جاقتى زەردەلەگەن ول الداعى ۋاقىتتا جاستاردىڭ رەسەيلىك ۋنيۆەرسيتەتتەردىڭ ءبىلىم ساپاسى مەن دەڭگەيىنە ءىس جۇزىندە وزدەرى باعا بەرەتىنىن تىلىنە تيەك ەتكەن.