سپورتتىق اتۋدان قازاقستان قۇراماسىنىڭ قورجىنىندا پاريج وليمپياداسىنا 3 ليسەنزيا بار. بۇل تۋرالى تۋريزم جانە سپورت ءمينيسترى ەرمەك مارجىقپايەۆتىڭ سپورتتىق اتۋ فەدەراسياسىنىڭ باسشىلارى مەن جاتتىقتىرۋشىلار شتابىمەن كەزدەسۋىندە ايتىلدى، دەپ حابارلايدى اlmaty-akshamy.kz.
كەزدەسۋدە اتالعان قۇرامانىڭ كەيىنگى ءىرى حالىقارالىق تۋرنيرلەردەگى ونەرى قورىتىندىلانىپ، وليمپياداعا دايىندىق جوسپارى تانىستىرىلدى.
اتاپ ايتساق، قىتايداعى ازيا ويىندارىندا قازاقستان قۇراماسى ستەندتىك اتۋدان – 2 التىن جانە 3 قولا، وق اتۋ بويىنشا – 1 التىن، 2 كۇمىس جانە 2 قولا مەدال جەڭىپ الدى. سارى قۇرلىق دوداسىندا ز.يرنازاروۆا، كوماندالىق سكيت ميكستتە ءا.ورىنباي مەن ە.ەششەنكو جانە ايەلدەر اراسىنداعى كوماندالىق سكيتتە ز.كراۆچەنكو، ءا.ورىنباي، و.پانارينا توپ جاردى.
«وق اتۋ جانە ستەندتىك اتۋ – مەدالدار ەڭ كوپ ساراپقا سالىناتىن سپورت تۇرلەرىنىڭ ءبىرى. ۇلتتىق قۇرامانىڭ كەيىنگى جىلدارداعى ناتيجەلەرى ەلىمىزدە سپورتتىق اتۋدىڭ قارقىندى دامىپ كەلە جاتقانىن كورسەتەدى. مەرگەندەردىڭ ازيا ويىندارىنداعى جەتىستىگى بارشامىزدى قۋانتتى. ءونىمدى جۇمىس اتقارىلعانى كورىنىپ تۇر. ەڭ باستىسى – سىزدەر بۇكىل ەلدىڭ ءۇمىتىن اقتادىڭىزدار. الدا ليسەنزيالىق جارىستار مەن 2024 جىلعى جازعى وليمپيادا كۇتىپ تۇر. وسى سپورت ءتۇرىن سەرىك ەتكەن كوماندا كوشباسشىلارى ىرىكتەۋ سايىستارىنان ءساتتى ءوتىپ، ءتورتجىلدىقتىڭ باستى دوداسىندا لايىقتى ونەر كورسەتەدى دەپ ۇمىتتەنەمىز»، - دەدى ەرمەك مارجىقپايەۆ.
مينيسترلىك مالىمەتىنە سۇيەنسەك، قازىرگى ۋاقىتتا سپورتتىق اتۋدان قازاقستان قۇراماسىنىڭ قورجىنىندا پاريج وليمپياداسىنىڭ 3 ليسەنزياسى بار. 2024 جىلعا 4 ليسەنزيالىق تۋرنير جوسپارلانعان: 2 ستەندتىك جانە 2 وق اتۋ بويىنشا. دەمەك، جولدامالار سانىن ارتتىرۋعا مۇمكىندىك بار.