8 ناۋرىز – حالىقارالىق ايەلدەر كۇنى قارساڭىندا تۋريزم جانە سپورت مينيسترلىگى سپورتشىلاردىڭ انالارىن شۋاقتى مەرەكەمەن قۇتتىقتادى.
ۆەدومستۆو باسشىسى ەرمەك مارجىقپايەۆ ەل ابىرويىن الەمدىك ارەنادا لايىقتى قورعاپ جۇرگەن ازاماتتاردى تاربيەلەگەنى ءۇشىن العىسىن ءبىلدىردى، دەپ حابارلايدى اlmaty-akshamy.kz.
«ءاربىر ادامنىڭ ومىرىندە انانىڭ ورنى بولەك. سپورتشىلار دا اناعا ارقا سۇيەيدى. بالالارىن جاتتىعۋعا دا اپاراتىن، رۋحاني قولداۋ كورسەتەتىن دە انالار. سوندىقتان سپورتشىنىڭ اناسى بولۋ – ۇلكەن ەڭبەك جانە ماماندىق دەپ تە ايتۋعا بولادى. سىزدەردىڭ بالا تاربيەسىندەگى ءرولىڭىزدى سوزبەن جەتكىزۋ قيىن جانە سىزدەر دە سپورتشىلار سياقتى كەز كەلگەن قۇرمەت پەن ماراپاتقا لايىقسىزدار. ويتكەنى بالالارىڭىز بيىك شىڭدى باعىندىرۋ ءۇشىن كوپ نارسەنى قۇربان ەتتىڭىزدەر، دەگەنمەن، سونىڭ وتەۋى رەتىدە بۇگىندە وسىنداي كەرەمەت ماقتانىش پەن قۋانىشقا بولەنىپ وتىرسىزدار. انا – كەز كەلگەن سپورتشىنىڭ ەڭ ءبىرىنشى جانكۇيەرى، ەڭ جاقىن دوسى، ادال تالىمگەرى جانە، ارينە، ەڭ قىمبات ادامى. قامقورلىق پەن تاربيەنىڭ، بالاڭىزدىڭ قابىلەتىنە دەگەن سەنىمنىڭ ارقاسىندا سىزدەر ناعىز چەمپيونداردى وسىرە الدىڭىزدار. بارشاڭىزدى كوكتەمنىڭ وسى ءبىر شۋاقتى مەرەكەسى – حالىقارالىق ايەلدەر كۇنىمەن شىن جۇرەكتەن قۇتتىقتايمىن!»، - دەدى ەرمەك مارجىقپايەۆ.
كەزدەسۋ بارىسىندا تۋريزم جانە سپورت ءمينيسترى مەملەكەت باسشىسى ق.توقايەۆتىڭ شاحماتتان حالىقارالىق گروسسمەيستەر ءسادۋاقاسوۆا دينارانى قۇتتىقتاۋ حاتىن اناسى وتەشوۆا ورال ماحمەتقىزىنا تابىستادى. سونىمەن قاتار، ءىس-شاراعا قاتىسقان قۇرمەتتى مەيماندارعا العىس حات پەن ەستەلىك سىيلىق تابىستالدى. ءوز كەزەگىندە، انالار ريزاشىلىعىن ءبىلدىرىپ، ەلىمىزدەگى بارشا ايەل قاۋىمىن مەرەكەمەن قۇتتىقتادى. سونداي-اق سپورتشىلارىمىز حالىقارالىق بايراقتى باسەكەلەردەگى ونەرىمەن تەك ءوز اتا-انالارىن عانا ەمەس، ەلىمىزدىڭ بارشا جانكۇيەرىن قۋانتۋعا تىلەكتەس ەكەندىگىن جەتكىزدى.
