كوروناۆيرۋستىق شەكتەۋلەر قايتا ەنگىزىلە باستادى.
COVID-19 شالدىعۋشىلار كوبەيۋىنە بايلانىستى ءبىرقاتار ەلدەردە كوروناۆيرۋستىق شەكتەۋلەر قايتا ەنگىزىلىپ جاتىر،دەپ حابارلايدى Almaty-akshamy.kz COVID-19 تارالۋىنا جول بەرمەۋ جونىندەگى ۆاك-عا سىلتەمە جاساپ.
كاتاردا 7 شىلدەدەن باستاپ جەرگىلىكتى تۇرعىندار مەن تۋريستەر جابىق ورىنداردا، كولىكتەردە بەتپەردە كيۋگە مىندەتتى. بۇل ەل ازاماتتارى ءبىر ايداي ۋاقىتقا عانا شەكتەۋسىز ءومىر ءسۇردى. ۇكىمەت جابىق قوعامدىق ورىنداردا ماسكالاردى مىندەتتى تۇردە كيۋدى 21 مامىردا عانا توقتاتقان بولاتىن.
وسىنداي تالاپتار 8 شىلدەدەن باستاپ كيپردە دە قولدانىلا باستادى.
«ماسكالاردى 12 جاستان اسقان بارلىق ازاماتتار كيۋى كەرەك»، - دەدى دەنساۋلىق ساقتاۋ ءمينيسترى ميحاليس حادزيپاندەلاس.
ول جاڭا ەرەجەلەردى ەنگىزۋ سەبەبىن سوڭعى كۇندەردەگى بارلىق ەپيدەميولوگيالىق كورسەتكىشتەر مەن كوروناۆيرۋسپەن اۋىراتىن ناۋقاستاردى اۋرۋحاناعا جاتقىزۋ سانىنىڭ ارتۋىمەن ءتۇسىندىردى.
تۇركيادا مەديسينالىق قاۋىمداستىق (TTB) ۇكىمەتكە مىندەتتى تۇردە ماسكا كيۋدى قايتا ەنگىزۋگە شاقىردى.
«COVID-19 ينفەكسياسىنا شالدىعۋ كورسەتكىشتەرى ءوسىپ جاتىر. ۆاكسينالاۋدى بالالاردان باستاۋ كەرەك، بارلىعىنا جابىق ورىنداردا بەتپەردە كيۋدى مىندەتتەۋ كەرەك، تەستتەر سانىن كوبەيتۋ قاجەت، ولاردىڭ ناتيجەلەرى تۋرالى كۇندەلىكتى مالىمەتتەرمەن ءبولىسۋ كەرەك»، - دەپ اتاپ ءوتتى مەديسينالىق قوعامداستىق وكىلدەرى.