ەلىمىزدە 200 مىڭعا جۋىق ازامات قۇمار ويىندار مەن ءباس تىگۋدەن ءوز ەركىمەن باس تارتتى.
تۋريزم جانە سپورت مينيسترلىگىنىڭ مالىمەتىنشە، وتكەن جىلى ىسكە قوسىلعان جۇيە ءقازىر وڭ ناتيجە كورسەتۋدە. بۋكمەكەرلىك كەڭسەلەر مەن كازينولار، قۇمار ويىن سايتتارىنان ءوزىن شەكتەيتىندەر قاتارى ارتىپ كەلەدى، دەپ حابارلايدى aqshamnews.kz.
مۇنداي شەشىمگە كەلگەندەردىڭ دەنى - جاستار. سونداي-اق، جاڭا جۇيەگە اتا-انالار تاراپى دا ءجيى جۇگىنەتىن بولعان.
ەلدە 400 مىڭعا جۋىق ادام بۋكمەكەرلىك كەڭسەلەر مەن كازينولاردىڭ تۇراقتى تۇتىنۋشىلارىنا اينالعان. بۇگىندە ەلدە ويىنعا تاۋەلدىلەردى تەگىن ەمدەيتىن 20 مەملەكەتتىك مەكەمە بار.
التىناي توكەن قىزى، ق ر دسم «رەسپۋبليكالىق دەنساۋلىق عىلىمي-پراكتيكالىق ورتالىعى» باس ديرەكتورى:
نەگىزى بىزدە 20 ەمدەۋ مەكەمەسى بار. ول پسيحيكالىق ورتالىقتار، سوندا ەم الۋعا بولادى. جانە قوسىمشا وڭالتۋ ورتالىقتار جۇمىس ىستەيدى. ول بىزدە 6 ەرەسەكتەرگە ارنالعان جانە 6 بالالارعا ارنالعان وڭالتۋ ورتالىقتارى بار.
سوڭعى 3 جىلدا قازاقستاندىقتار قۇمار ويىندارعا 1 ترلن تگ جۇمساعان. ءقازىر مەملەكەت لۋدومانيامەن كۇرەستى كۇشەيتتى. بىلتىر 3 جىلدىق كەشەندى جوسپار قابىلدانعان. سودان بەرى 187 مىڭنان استام ادام قۇمار ويىننان ءوز ەركىمەن باس تارتقان.
ابدەل بالتاتەگى، ق ر تۋريزم جانە سپورت مينيسترلىگىنىڭ باسقارما باسشىسى:
نەگىزى ءوز-وزىن شەكتەۋ بويىنشا ەكى جولمەن جۇمىستار جاساۋعا بولادى. ول ە-قىزمەت پەن ە-وتىنىشپەن ارقىلى ءبىزدىڭ كوميتەتىمىزدىڭ اتىنا ءوتىنىش جازىپ، شەكتەۋگە بولادى. جانە eGov قوسىمشاسى ارقىلى ونلاين شەكتەۋ قويۋعا بولادى. 6 ايدان - 10 جىلعا دەيىن. جانە ول ءوتىنىش قايتارىلمايدى. باسقا ادامدار دا سوت ارقىلى بالالارىنا، تۋىسقاندارىنا شەكتەۋ قويا الادى.
ءقازىر كوشەلەردە، ۇيلەردىڭ قاسبەتى مەن كولىكتەردىڭ سىرتىندا بۋكمەكەرلىك كەڭسەلەردى جارنامالاۋعا تىيىم سالىنعان. ودان بولەك، نەسيەسىن 90 كۇننەن استام ۋاقىت تولەمەي جۇرگەن، اليمەنت پەن سالىققا قارىزى 3 ملن-نان اسقان ازامات ءباس تىگە المايدى. وعان قوسا، 300 مىڭعا جۋىق اسكەري مەن مەملەكەتتىك قىزمەتشىلەر ويىن بيزنەسىنەن شەتتەتىلدى.