سولتۇستىك كورەيا ازىق-تۇلىك تاپشىلىعىنان زارداپ شەگۋدە. حالىقارالىق سانكسيالار مەن پاندەميا جاعدايدى ودان ءارى ناشارلاتتى. ەندى ولار قارا اققۋلاردى ەت باعىتىندا ءوسىرۋدى كوزدەپ وتىر، دەپ حابارلايدى almaty-akshamy.kz قازاقپاراتقا سىلتەمە جاساپ.
سولتۇستىك كورەيادا قارا اققۋلار ونەركاسىپتىك كولەمدە ەت ءۇشىن وسىرىلەتىن فەرمانىڭ قۇرىلىسى اياقتالدى. بۇل ەل بيلىگىنىڭ ازىق-تۇلىكتىڭ ارتۇرلىلىگىن ارتتىرۋ جوسپارىنىڭ ءبىر بولىگى جانە ازىق-تۇلىك داعدارىسىن ءوز بەتىمەن جەڭۋ ارەكەتىنىڭ ءبىرى. سولتۇستىك كورەيا شەنەۋنىكتەرى اتالمىش قۇستاردىڭ ەتى وتە قۇنارلى ەكەنىن، اسسورتيمەنتىن كوبەيتۋ حالىقتىڭ ءومىر ءسۇرۋ ساپاسىنا وڭ اسەر ەتەتىنىن العا تارتادى. 2019 جىلى بيلىك مەكتەپتەر مەن كاسىپورىندارعا «ءوزىن-وزى قامتاماسىز ەتۋدى ارتتىرۋ» ءۇشىن جەۋگە بولاتىن كەز كەلگەن نارسەنى وسىرۋگە جانە كوبەيتۋگە بۇيرىق بەردى.
ءقازىر سولتۇستىك كورەيا اقپارات قۇرالدارى قارا اققۋ ەتىن تۇتىنۋعا ۇگىتتەپ جاتىر. ەل كوشباسشىسى كيم چەن ىن شەكارالاردىڭ جابىقتىعىنا بايلانىستى ەلدەگى ازىق-تۇلىك جاعدايى شيەلەنىسىپ تۇرعانىن مويىنداپ، كوروناۆيرۋستىڭ تارالۋىن توقتاتۋ ءۇشىن وسىنداي قۇرباندىققا بارۋعا ءماجبۇر بولعاندىعى ءۇشىن تۇرعىنداردان كەشىرىم سۇرادى.