ەنەرگەتيكا سالاسىنداعى ىنتىماقتاستىق
ءاليحان سمايىلوۆ «شيەۆرون» كومپانياسىنىڭ باسشىلىعىمەن گاز جەتكىزۋ جانە بىرلەسكەن جوبالاردى ىسكە اسىرۋ ماسەلەلەرىن تالقىلادى، دەپ حابارلايدى Almaty-akshamy.kz.
پرەمەر-مينيستر ءاليحان سمايىلوۆ «شيەۆرون» كومپانياسى ديرەكتورلار كەڭەسىنىڭ ءتوراعاسى جانە باس اتقارۋشى ديرەكتورى مايكل ۋيرتپەن كەزدەسۋ وتكىزدى.
تاراپتار كومپانيانىڭ قازاقستانداعى قىزمەتى، ىشكى نارىققا تاۋارلىق جانە سۇيىتىلعان مۇناي گازىن جەتكىزۋ، سونداي-اق تەڭىز جانە قاراشىعاناق كەن ورىندارىندا بىرلەسكەن جوبالاردى ىسكە اسىرۋ ماسەلەلەرىن تالقىلادى.
ۇكىمەت باسشىسى «شيەۆرون» كومپانياسى قازاقستاننىڭ العاشقى ستراتەگيالىق سەرىكتەستەرىنىڭ ءبىرى ەكەنىن، ەلىمىزدە كوپتەگەن ەكونوميكالىق جانە الەۋمەتتىك ماسەلەلەردى شەشۋگە قاتىسقانىن اتاپ ءوتتى.
«قازىرگى تاڭداعى الەمدەگى احۋال بىزدەن ەنەرگەتيكا سالاسىنداعى ىنتىماقتاستىقتى كەڭەيتۋدى تالاپ ەتەدى. مەملەكەت باسشىسىنىڭ تاپسىرماسى بويىنشا “QazaqGaz” ۇلتتىق كومپانياسىنا تاۋارلىق گازدىڭ قوسىمشا كولەمىن ساتۋ تۋرالى ۋاعدالاستىققا قول جەتكىزىلدى. بۇل ءبىزدىڭ رەسۋرستىق بازامىزعا ۇلكەن اسەر ەتەدى»، — دەدى ءاليحان سمايىلوۆ.
سونىمەن قاتار پرەمەر-مينيستر تەڭىز كەن ورنىنداعى ساعالىق قىسىمدى كەڭەيتۋ جانە باسقارۋ جوبالارىن ىسكە اسىرۋدىڭ ماڭىزدىلىعىن اتاپ ءوتتى.
ۇكىمەت باسشىسى قازاقستاننىڭ ىشكى نارىقتى سۇيىتىلعان مۇناي گازىمەن قامتاماسىز ەتۋ ماسەلەسىنە ەرەكشە نازار اۋداراتىنىن ايتتى. وسىعان بايلانىستى تشو رەسۋرستارىنان ىشكى نارىققا قوسىمشا گاز ءبولۋ ماسەلەسى پىسىقتالىپ جاتىر.
سونىمەن قاتار ءاليحان سمايىلوۆ «شيەۆرون» كومپانياسىنىڭ $248 ملن-عا تىكەلەي ينۆەستيسيالار قورىن قۇرۋ بويىنشا جۇرگىزگەن جۇمىسىن اتاپ ءوتتى. قور جۇمىسى اياسىندا وتاندىق ينۆەستيسيالىق جوبالار ىسكە اسىرىلماق.
ءوز كەزەگىندە مايكل ۋيرت «شيەۆرون» كومپانياسىنىڭ بىرلەسكەن جوبالاردى ىسكە اسىرۋدى جالعاستىرۋعا دايىندىعىن راستادى.
«قازاقستاننىڭ ەنەرگەتيكالىق سەكتوردا دامۋ الەۋەتى زور. ونى ىسكە اسىرۋ جاڭا جۇمىس ورىندارىن قۇرۋعا جانە ەكونوميكا ءۇشىن قوسىمشا مۇمكىندىكتەر اشۋعا كومەكتەسەدى. ءبىزدىڭ جوبالار بويىنشا ۇلكەن جۇمىس اتقارىلدى، الايدا بولاشاقتا ءالى دە كوپ جۇمىس جۇرگىزۋ كەرەك»، — دەدى مايكل ۋيرت.
سونداي-اق پرەمەر-مينيستر مۇناي-گاز سالاسىنىڭ ينۆەستيسيالىق تارتىمدىلىعىن ارتتىرۋ اياسىندا ينۆەستورلار ءۇشىن قازىنالىق جانە رەتتەۋشى پرەفەرەنسيالار پاكەتىن قامتيتىن جاقسارتىلعان مودەلدىك كەلىسىمشارت ازىرلەنەتىنىن حابارلادى. ول جاڭا تەڭىز جوبالارىنا، قۇرلىقتاعى كۇردەلى جوبالارعا جانە گاز جوبالارىنا قولدانىلادى.
«ءبىز بىرلەسە ۇلكەن جول ءجۇرىپ وتتىك. قازاقستان ۇكىمەتىنىڭ بىرلەسكەن جوسپارلاردى ىسكە اسىرۋدا سىندارلى ديالوگقا ءاردايىم اشىق ەكەندىگىنە سەندىرگىم كەلەدى»، — دەدى ءاليحان سمايىلوۆ.